Հայաստանի անտառային տարածքների վարձակալությունների պայմանագրերն ուսումնասիրելու նպատակով Շրջակա միջավայրի նախարարության Անռատային կոմիտեի նախագահի պաշտոնակատարի հրամանով ստեղծվել է հանձնաժողով: Միևնույն ժամանակ Գլխավոր դատախազությունում քննվող քրեական գործում է ներառվել Սյունիքի մարզի անտառային հողերի վարձակալություններին վերաբերող «Հետք»-ի նյութը: Այս մասին տեղեկանում ենք Դատախազությունից և Անտառային կոմիտեից ստացված մեր հարցումների պատասխաններից:

«Հետք»-ը անտառային հողերի վարձակալությունների մասին արդեն չորս հոդված է հրապարակել: Անդրադարձել ենք Սյունիքի, Վայոց ձորի, Լոռու և Արագածոտնի մարզերի վարձակալներին՝ առանձին-առանձին:

Անտառային կոմիտեում ստեղծված հանձնաժողովը ստուգում է վարձակալների կողմից պայմանագրային պարտավորությունների պատշաճ կատարված լինելը:

Ուսումնասիրություններն ավարտական փուլում են, որից հետո առաջարկներ է ներկայացվելու կոմիտեի և «Հայանտառ» ՊՈԱԿ-ի ղեկավար կազմին: Անտառային կոմիտեի գլխավոր քարտուղար Էդուարդ Սեինյանի հավաստմամբ՝ աշխատանքներ են տարվելու անտառային հողերի վարձավճարների չափը Կառավարության 2010 թ.-ի 668-Ն որոշման պահանջներին համապատասխանեցնելու ուղղությամբ:

Վարձավճարների չափի անհամապատասխանությանը մենք անդրադարձել ենք մեր նախորդ բոլոր նյութերում՝ նշելով, որ բազմաթիվ վարձակալներ վճարում են չնչին վարձավճարներ՝ տիրապետելով մեծածավալ անտառային հողերի ավելի ցածր վարձավճարով, քան սահմանվել է Կառավարության 2010 թ.-ի վերը նշված որոշմամբ:

Գլխավոր դատախազությունից էլ փոխացեցին, որ «Անտառտնտեսության ղեկավարն անտառային հողեր է վարձել չնչին վարձավճարով. մաս 1, Սյունիք» վերնագրով հոդվածում տեղ գտած հանգամանքները ներառված են պաշտոնեական լիազորությունները չարաշահելու հատկանիշներով հարուցված քրեական գործում:

Դատախազությունից նաև փոխանցել են, որ Լոռու և Վայոց ձորի անտառային հողերի վարձակալությունների մասին մեր նյութերն ուղարկվել են Լոռու և Վայոց ձորի մարզերի դատախազություն հրապարակումներում տեղ գտած հանգամանքները ստուգելու նպատակով։