Նարեկ Մութաֆյանն ազատ է արձակվել
Վերաքննիչ քրեական դատարանը՝ նախագահությամբ դատավոր Ռուբիկ Մխիթարյանի, բավարարել է դատավոր Աննա Դանիբեկյանի գործով մեղադրյալ Նարեկ Մութաֆյանի պաշտպանների բողոքը՝ նրա կալանքի ժամկետը երկարացնելու որոշման դեմ և Նարեկ Մութաֆյանին ազատ արձակելու որոշում կայացրել: Այս մասին «Հետք»-ի հետ զրույցում ասաց Մութաֆյանի պաշտպաններից Արամ Վարդևանյանը:
Հիշեցնենք, որ Նարեկ Մութաֆյանն ու Սարգիս Օհանջանյանը մեղադրվում են արդարադատության իրականացմանը խոչընդոտելու նպատակով դատարանի գործունեությանը ցանկացած ձևով միջամտելու մեջ. գործն արդեն դատարան է ուղարկվել։
Ըստ «Դատալեքսում» առկա մեղադրական եզրակացության համառոտ բովանդակության՝ նրանց մեղադրանք է առաջադրվել այն բանի համար, որ, նախապես տեղեկանալով Ռոբերտ Քոչարյանի և մյուսների վերաբերյալ քրեական գործը քննող Երևան քաղաքի ընդհանուր իրավասության դատարանի Շենգավիթ նստավայրի դատավոր Աննա Դանիբեկյանի կողմից ՀՀ արդարադատության ակադեմիայում գտնվելու և դասընթացների մասնակցելու մասին, դատավորի կարծիքի վրա ազդելու նպատակով, 2019թ. սեպտեմբերի 27-ին, ժամը 16:50-ի սահմաններում, իրենց հանցավոր մտադրությունն իրականացնելու նպատակով գնացել են Երևան քաղաքի Փիրումյանների փողոցի թիվ 9 հասցեում գործող Արդարադատության ակադեմիա, սպասել նշված վայրի բակում, որպեսզի դասընթացների ավարտից հետո հանդիպեն Դանիբեկյանին, հանդիպումը տեսաձայնագրի և այն ուղիղ կապի միջոցով «փորձենք օգնել ֆեմիդային» վերտառությամբ հոդվածի տեսքով տարածեն համացանցում, սակայն Դանիբեկյանը, խույս տալով վերջիններիցս, դուրս է եկել ակադեմիայի հետևի մուտքից ու հեռացել:
Այնուհետև, նույն օրը՝ ժամը 20:30-ի սահմաններում, շարունակելով իրենց հանցավոր մտադրությունը, Երևան քաղաքի Արշակունյաց պողոտայի 28 հասցեում գտնվող Կոմիտասի անվան պանթեոնի հարակից այգում հետապնդել են իր բնակության վայր գնացող Դանիբեկյանին և վերջինիս պատիվն ու արժանապատվությունը նվաստացնելով` հարցրել նրան, թե արդյոք «վնգստացող» դատավորների շարքի՞ն է պատկանում` կապված Ռ. Քոչարյանի նկատմամբ ընտրված խափանման միջոցի որոշման հետ, որից հետո Նարեկ Մութաֆյանն առաջարկել է նրան ցույց տալ գլխի հատվածը պարզելու համար՝ փայտի հարվածների հետքեր կան նրա գլխին, թե` ոչ, որից հետո փորձել է տեսանկարահանել այդ հատվածը և այդ ամենն իր ու Օհանջանյանի կողմից տեսաձայնագրելու և ուղիղ կապի միջոցով համացանցում տարածելու ձևով ճնշում գործադրելով` միջամտել է Ռոբերտ Քոչարյանի վերաբերյալ դատական գործով Դանիբեկյանի կողմից հետագայում կայացվելիք որոշումների արդարացի ընդունման վրա։
Նշենք, որ օրեր առաջ Վերաքննիչ դատարանի մեկ այլ դատավորի՝ Վազգեն Ռշտունու որոշմամբ ազատ է արձակվել նաև մեղադրյալ Սարգիս Օհանջանյանը։
Մութաֆյանին և Օհանջանյանին կալանավորելու, ինչպես նաև նրանց կալանքի ժամկետները մեկ ամսով երկարացնելու որոշումները կայացրել էին Երևան քաղաքի ընդհանուր իրավասության դատարանի Շենգավիթի նստավայրի դատավորներ Արտուշ Գաբրիելյանը և Նելլի Բաղդասարյանը։ Ստացվում է, որ նրանց երկուսի կայացրած որոշումներն էլ Վերաքննիչ դատարանում բեկանվել են։
Լուսանկարում՝ աջից՝ Նարեկ Մութաֆյանը, ձախից՝ Սարգիս Օհանջանյանը
Մեկնաբանել