Ալեգորիաներով վիրավորանքներ, սանկցիաների չարաշահման մեղադրանքներ. ԱԺ հերթական նիստը վիճաբանությամբ սկսվեց
Ազգային ժողովի հերթական նիստի աշխատանքներն այսօր սկսվեցին Երևանի քաղաքապետարանի նվիրատվություններն ուսումնասիրող քննիչ հանձնաժողովի տապալման քննարկմամբ ու վիճաբանությամբ: «Լուսավոր Հայաստան» խմբակցության ղեկավար Էդմոն Մարուքյանը մեղադրեց ԱԺ նախագահ Արարատ Միրզոյանին քվեարկության տապալման մեջ:
«Սահմանադրության 104-րդ հոդվածի 2-րդ մասի համաձայն` ԱԺ նախագահն ապահովում է ԱԺ-ի բնականոն գործունեությունը, ես ուզում եմ Ձեզ հարց ուղղել` ինչու՞ չեք ապահովում խորհրդարանի բնականոն գործունեությունը՝ կապված այն իրավիճակի հետ, որ ԱԺ-ի մեկ քառորդի ստորագրություններն են հավաքվել, և հանձնաժողովը չի կարող գործել: Իրավունքի ուժով ստեղծված հանձնաժողովը չունի կազմ, խորհրդարանի ցանկացած հանձնաժողով չի գործում, նշանակում է խորհրդարանի ինչ-որ մարմին չի գործում, նշանակում է խորհրդարանի նախագահը չի կարողանում ապահովել բնականոն գործունեությունը: Ինչո՞վ Ձեզ օգնենք, որ կարողանաք խորհրդարանի բնականոն գործունեությունն ապահովել»,- Մարուքյանը դիմեց Արարատ Միրզոյանին:
«Պարոն Էդմոն Մարուքյան, ես Ձեր օգնության կարիքը բնավ չունեմ, կարծում եմ՝ որպես փորձված իրավաբան պետք է շատ լավ հասկանայիք, որ ԱԺ նախագահը քննարկվող հարցի առնչությամբ իր իրավասությունների շրջանակում ինչ պարտավոր էր ու կարող էր անել, արել է, մնացյալը` թիվը հաստատելու վերաբերյալ, ԱԺ-ի որոշման նախագիծը քվեարկվում է լիագումար նիստի ընթացքում: Պատգամավորներն իրենց քվեարկության մեջ ազատ են, կարող են քվեարկել ազատ, մեղադրել ԱԺ նախագահին քվեարկությունների արդյունքի մեջ՝ նշանակում է լավ չհասկանալ Սահմանադրության տրամաբանությունը»,-արձագանքեց Արարատ Միրզոյանը:
Հիշեցնենք, որ իրավունքի ուժով ստեղծված հանձնաժողովը չի կարող գործել, քանի որ հանձնաժողովի կազմի ձևավորման քվեարկությունը տապալվեց: Երեկ ԱԺ-Կառավարություն հարցուպատասխանին այս թեմային անդրադարձավ նաեւ վարչապետ Նիկոլ Փաշինյանը` ասելով, որ իշխող ուժը քաղաքական որոշում է կայացրել գնալ իրավական ճանապարհով, իսկ իրավական ճանապարհը Երևանի ավագանու «Իմ քայլը» խմբակցության իրավական վերլուծությունն է, ըստ որի՝ խորհրդարանը չի կարող Երևանի քաղաքապետարանի նվիրատվություններն ուսումնասիրող քննիչ հանձնաժողով ձևավորել:
«Երեկ հարցուպատասխանի ժամանակ պարզվեց, որ քաղաքական որոշմամբ եք տապալել հանձնաժողովի ձևավորումը, բայց հիմա ինձ պատասխանում եք, որ պատգամավորներն ազատ են քվեարկել: Քվեարկության որոշու՞մ է եղել, թե ազատ եք քվեարկել»,-շարունակեց Մարուքյանը:
Արարատ Միրզոյանն արձագանքեց` Մարուքյանը հավանաբար լավ չի հասկացել վարչապետի խոսքերը:
«Թիմի քաղաքական կամքը եղել է օժանդակել այդ քննությանը, մենք քաղաքական կամք ենք ունեցել գնալ մինչև վերջ: Ուրիշ բան էր ասում վարչապետը, ասում էր՝ ընթացքում պարզվեց, որ իրավական խնդիրներ կան այդ հանձնաժողովի գործունեության մեջ: Դուք սխալ եք հասկացել»,- ասաց ԱԺ խոսնակը:
Մարուքյանը կոչ արեց Միրզոյանին մնալ կոռեկտության շրջանակներում:
«Երեկվա վիրավորանքների` ընդդիմությանը ձիու հետ համեմատելու համար պետք է ներողություն խնդրեք: Մենք ամեն ինչ հասկացել ենք, երևի Դուք չեք կարողացել գիտակցել Ձեր դերը այս խնդիրը լուծելու համար: Դուք պիտի ապահովեիք հանձնաժողովի ձևավորման պրոցեսը, Դուք եք բնականոն գործունեության պատասխանատուն: Դուք 3 օր ժամանակ ունեիք փաստաթղթերն իրավական վերլուծության ենթարկելու և նոր հայտարարելու հանձնաժողովի ստեղծման մասին: Դուք ստուգել եք փաստաթղթերը և հայտարարել եք հանձնաժողովի ստեղծման մասին, որից հետո Երևանի քաղաքապետարանի ինչ-որ իրավաբաններ ասում են՝ դուք իրավունք չունեք: ԱԺ-ն իջեցնում եք Երևանի ավագանուց ցածր մակարդակի, իրենք են որոշում՝ ԱԺ-ն ինչ իրավունք ունի, ինչ չունի»,- ասաց Էդմոն Մարուքյանը:
Միրզոյանն արձագանքեց` ըստ «ԱԺ կանոնակարգ-օրենքի», եթե պատգամավորների անհրաժեշտ թվով ստորագրություններն առկա են, և մի քանի այլ տեխնիկական բաղադրիչ ապահովված է, ԱԺ նախագահը հայտարարում է քննիչ հանձնաժողովի ստեղծման մասին:
«Այլ իրավասություն ԱԺ նախագահը չունի, ԱԺ նախագահը չի կարող իր հայեցողությամբ որոշել` սահմանադրակա՞ն է այն, սահմանադրական չէ, իրավաչա՞փ է, իրավաչափ չէ, չունի նման լիազորություն»,- ասաց Միրզոյանը:
Մարուքյանի խոսքին արձագանքեց «Իմ քայլը» խմբակցության պատգամավոր Համազասպ Դանիելյանը, որն էլ Մարուքյանի նշած վիրավորական համեմատության հեղինակն էր:
«Հերթական անգամ խոսքս նենգափոխվեց այն քաղաքական ուժի ղեկավարի կողմից, ում ներկայացուցիչը մեկ այլ պատգամավորի ասեց՝ դուք շատ փոքր մարդ եք: Իմ խոսքը եղել է ալեգորիկ, ձիու հետ համեմատությունը խոսք է հանրահայտ, ինչպես խոսք է WatchDog-ը՝ ընդդիմությունը պահապան շուն է, կամ ԱԺ-ն` օրենսդիր մարմինը: Էնպես որ պետք չէ շատ խորը վիրավորվել»,- ասաց Համազասպ Դանիելյանը` հավելելով, որ այդ խոսքն ուղղված է եղել կոնկրետ մարդու, պետք չէ տարածել ամբողջ ընդդիմության վրա:
Տեղից սկսեց խոսել Էդմոն Մարուքյանը: Հիշեցնենք, որ երեկ ԱԺ նախագահը նկատողություն տվեց Մարուքյանին, երբ վերջինս ընդհատում էր Ռուբեն Ռուբինյանի ելույթը: Այս նկատողությունը Մարուքյանը բնութագրեց ԱԺ նախագահի լիազորությունների չարաշահում: Ըստ Մարուքյանի՝ ԱԺ նախագահը միակողմանի է սանկցիաներ կիրառում:
«Դուք երեկ հայտարարում էիք, որ միակողմանի նախազգուշացում եմ Ձեզ տվել, պարոն Մարուքյան, հանուն արդարության… Երբ Դուք խոսում էիք, և գուցե այնքան էլ ականջահաճո չէր պարոն Ռուբինյանի համար, բայց նա ուշադիր Ձեզ լսում էր: Երբ ի պատասխան պարոն Ռուբինյանն էր խոսում, Դուք էդտեղից իջաք, կանգնեցիք էստեղ և սկսեցիք զուգահեռ խոսել, գոռալ և խանգարել պարոն Ռուբինյանի խոսքը: Ես` որպես նախագահ, ով պարտավոր է ապահովել ԱԺ-ի բնականոն գործունեությունը, այդ արարքի համար Ձեզ հայտարարեցի նախազգուշացում: Դուք ինձ մեղադրեցիք միակողմանի լինելու մեջ, բայց կարծում եմ՝ բոլորի համար ակնհայտ է, որ խիստ անարդար կլիներ, եթե նույն դրվագի համար պարոն Ռուբինյանին էլ նախազգուշացում հայտարարեի»,- ասաց Միրզոյանը:
«Բարգավաճ Հայաստան» խմբակցության պատգամավոր Նաիրա Զոհրաբյանն էլ առաջարկեց հստակեցնել խաղի կանոններրը:
«Մեր ձևակերպումներն ինչի՞ ալեգորիաներ չեք ընկալում: Ես կարծում եմ՝ միասին պիտի մշակենք փոխադարձ էթիկայի կանոններ, ես այլևս չեմ պատրաստվում հանդուժել որոշ պատգամավորների անձնապես իմ հասցեին հնչած վիրավորանքները: Որոշների վերաբերյալ մտադիր եմ սկսել իրավական գործընթաց, ես անվտանգության ռիսկեր եմ տեսնում իմ անձի համար»,- ասաց Զոհրաբյանը: Արարատ Միրզոյանն արձագանքեց` լավ կլինի խաղի կանոնները պահպանեն բոլորը, այդ թվում` առաջարկողները:
Էդմոն Մարուքյանը, անդրադառնալով ԱԺ նախագահի կիրառած սանկցիաներին, ասաց, որ համոզվել են՝ վերջինս անաչառ արբիտր չէ, ոչ թե ամբողջ խորհրդարանի նախագահն է, այլ միայն «Իմ քայլը» խմբակցության:
«ԱԺ նախագահն օգտվում է կանոնակարգ-օրենքից այնպես, ինչպես երբեք որևէ մեկը չի օգտվել: Ցանկացած սանկցիա, որ այդտեղ նշված է, բացառիկ միջոցներ են, դրանք չեն կարող ամեն օր կիրառվել, և դրանք ինքնահաստատման մեթոդներ չեն ինչ-որ մեկի համար: Դուք նպաստել եք ընդդիմության իրավունքների խախտմանը: Ինչ վերաբերում է վիրավորանքներին, ալեգորիաներով էնպիսի վիրավորանքներ կարող ենք տալ, որ տակից չեն կարող դուրս գալ: Բա Դուք էդտեղ նստած եք, պարոն Միրզոյան, մարդը ալեգորիայով վիրավորում է, էդ մարդն իրեն ու՞մ տեղն է դրել»,- ասաց Մարուքյանը:
«Լուսավոր Հայաստան» խմբակցության քարտուղար Գևորգ Գորգիսյանն էլ ասաց՝ եթե խոսեն ալեգորիաներով, կարող են անգլիական ասացվածքներից վերադառնալ հայկական ասացվածքներին:
«Որտեղ ասվում է՝ խոզի գլուխը դնում ես խալու վրա, գլորվում, ընկնում է ցեխը, եկեք մնանք կոռեկտության մեջ, ալեգորիաները շատ են»,- ասաց նա:
Տեղեկացնենք, որ այս ամենը տեղի էր ունենում «ԱԺ կանոնակարգ-օրենք»-ի խախտմամբ: Պատգամավորները վարման կարգով խոսք էին խնդրում նախագծերի քվեարկությունից առաջ, իսկ վարման կարգով քվեարկությունից առաջ պատգամավորները կարող են խոսել քվեարկվող նախագծի վերաբերյալ` հայտնելով, թե ինչպիսի քվեարկություն են կատարելու և ինչու:
Մեկնաբանել