Ուկրաինայի ԱԳՆ-ն արձագանքել է արցախա-ադրբեջանական շփման գոտում իրավիճակի սրմանը
Ուկրաինայի ԱԳՆ-ն Երևանին և Բաքվին կոչ է արել դադարեցնել դիմակայությունը և վերադառնալ հակամարտության խաղաղ կարգավորման։ Այդ մասին նշված է ուկրաինական գերատեսչության թվիթերյան միկրոբլոգում։
MFA of Ukraine is deeply concerned about the escalation of the conflict btw Armenia & Azerbaijan. We examine circumstances that led to escalation, call on the parties to return to the dialogue & settle the conflict by peaceful means. Our thoughts are with the relatives of victims
— MFA of Ukraine ?? (@MFA_Ukraine) September 27, 2020
«Ուկրաինայի ԱԳՆ-ն իր խորին մտահոգությունն է հայտնում Հայաստանի և Ադրբեջանի միջև հակամարտության սրման կապակցությամբ։
Մեծ ուշադրությամբ ուսումնասիրում ենք հանգամանքները, որոնք հանգեցրել են լարվածության սրմանը: Կոչ ենք անում կողմերին վերադառնալ երկխոսության՝ ի նպաստ հակամարտության խաղաղ կարգավորման: Ցավակցում ենք զոհվածների հարազատներին և մտերիմներին»,- նշվում է տարածված հաղորդագրության մեջ։
Հիշեցնենք` ավելի վաղ հրադադարի պահանջով հանդես էին եկել Վրաստանի նախագահ Սալոմե Զուրաբաշվիլին, Եվրոպական խորհրդի ղեկավար Շարլ Միշելը, ԵԱՀԿ համանախագահները, ՀԱՊԿ-ն, Ռուսաստանի, Ուկրաինայի, Լիտվայի և Լատվիայի արտաքին գործերի նախարարությունները, Հռոմի Ֆրանցիսկոս I պապը։
Ավելի վաղ հայտնել էինք, որ վաղ առավոտից շփման գծի ողջ երկայնքով Ադրբեջանն ակտիվ հրետակոծություն է սկսել։ Հրետակոծվում են նաև խաղաղ բնակավայրերը, այդ թվում մայրաքաղաք Ստեփանակերտը: Հակառակորդի կրակոցների հետևանքով Մարտունիում մեկ կին և մեկ երեխա է զոհվել։ Կան նաև վիրավորներ։
Լուսանկարը՝ Wikimedia Commons-ի
Մեկնաբանել