Հայաստանի Առողջապահության նախարարությունը կիրառման արտոնություն է տվել կորոնավիրուսի դեմ օգտագործվող ռուսական «Спутник V» պատվաստանյութին։ Այս մասին հայտնում է ռուսական «РИА Новости»- ն՝ հղում անելով Ռուսաստանի ուղղակի ներդրումների հիմնադրամին (ՌՈՒՆՀ)։

Պատվաստանյութին արտոնություն տալու որոշումն ընդունվել է Առողջապահության նախարարի հրամանով՝ հիմք ընդունելով Ռուսաստանում իրականացրած կլինիկական փորձաքննությունների III փուլի տվյալները։ Այն Հայաստանում լրացուցիչ փորձաքննություններ չի անցնի։

Նշենք, որ «Спутник V» պատվաստանյութը գրանցված է աշխարհի 16 երկրում. բացի Ռուսաստանից, դեղը գրանցված է Բելառուսում, Արգենտինայում, Բոլիվիայում, Սերբիայում, Ալժիրում, Պաղեստինում, Վենեսուելայում, Պարագվայում, Թուրքմենստանում, Հունգարիայիում, Արաբական Միացյալ Էմիրություններում, Իրանում, Գվինեայում և Թունիսում։

«Спутник V» պատվաստանյութը մշակել է Գամալեայի անվան համաճարակաբանության և մանրէաբանության ազգային-հետազոտական կենտրոնը (ՀՄԱՀԿ)։ Այն պատվաստանյութն աշխարհում կորոնավիրուսի դեմ ստեղծված առաջին պատվաստանյութն էր, որը Ռուսաստանի առողջապահության նախարարությունը գրանցել է «Спутник V» դեռևս 2020թ. օգոստոսին։

Պատվաստանյութը ստեղծվել է մարդու ադենովիրուսային վեկտորների ուսումնասիրված և ստուգված պլատֆորմի վրա, որի «կարևոր առավելությունները», ըստ արտադրողի, «անվտանգությունն է, արդյունավետությունը և երկարաժամկետ բացասական հետևանքների բացակայությունը»:

«Спутник V»-ի արդյունավետությունը 90 %-ից ավելի է. պատվաստանյութը, ըստ Գամալեայի անվան ՀՄԱՀԿ, պաշտպանում է «կորոնավիրուսի ծանր ընթացքից»։

«Спутник V»-ի մեկ դեղարափի արժեքը մինչև մինչև 10 ԱՄՆ դոլար է։ Համեմատության համար՝ ամերիկյան «Pfizer» պատվաստանյութի մեկ դեղաչափն արժե արժե 20 ԱՄՆ դոլար, «Moderna»-ն՝ 10-50 ԱՄՆ դոլար, անգլիական «AstraZeneca»-ն՝ 4 ԱՄՆ դոլար։

Հենց այս վերջինից է առաջիկայում պատրաստվում ձեռք բերել Հայաստանի առողջապահության նախարարությունը՝ բնակչության 3%-ին պատվաստելու համար (ընդհանուր առմամբ՝ կորոնավիրուսի դեմ Հայաստանում պատվաստվելու է բնակչության 10%-ը)։

Ավելի վաղ՝ 2021թ. հունվարի 11-ից, Ռուսաստանի ԱՆ-ն թույլտատրել էր նաև «Спутник V»-ի մեկ այլ՝ «Спутник Лайт» միաբաղադրիչ պատվաստանյութի պարզեցված տարբերակի կլինիկական փորձարկումների իրականացումը մարդկանց վրա։ Փորձարկումներին մասնակցելու է 150 կամավոր։ Դրանք կտևեն մինչև 2021թ. դեկտեմբեր։

Գամալեայի անվան ՀՄԱՀԿ ղեկավար Ալեքսանդր Գինցբուրգը պարզաբանել է, որ «Спутник Лайт» պարզեցված տարբերակը բաղկացած է «Спутник V»-ի ընդամենը երկու բաղադրիչներից, և ի տարբերություն վերջինի, ավելի քիչ ժամանակով՝ 3-4 ամսով է ձևավորելու իմունիտետ կորոնավիրուսի դեմ։ Սակայն, նույնիսկ եթե այդ պատվաստանյութը ստանալուց հետո մարդիկ կորոնավիրուսով վարակվեն, ընթացքը դարձյալ ծանր չի լինի։

Ալեքսանդր Գինցբուրգ, լուսանկարը՝ Ռամիլ Սիտդիկով / РИА Новости

«Վիրուսի հարուցիչը չի իջնի թոքերը, ամեն ինչ կավարտվի սուր շնչառական հիվանդությունների մակարդակով»,- ասել է նա։

Այս պատվաստանյութի ներարկումից երեք ամիս անց հիվանդին կարելի կլինի ներարկել «Спутник V»-ի երկրորդ բաղադրիչը՝ երկարացնելով կորոնավիրուսի դեմ օրգանիզմի պաշտպանվածությունը։

«Спутник Лайт»-ի թողարկումը նախատեսված է 2021թ. փետրվարին։

Ռուսաստանի ԱՆ-ն Գամալեա կենտրոնի հետ համաձայնեցրել է նաև COVID-19 կանխարգելման համար կիրառվելիք դեղամիջոցների ստեղծման պետական հանձնարարությունը։

Բացի այդ, 2021-2023 թվականներին կենտրոնը նախատեսում է թողարկել հակակորոնավիրուսային միջոց սինթետիկ ոչ-նուկլեոտիդային կորոնավիրուսային պրոտեազի ինհիբիտորի (կանխարգելիչի, հեղ.) հիմքով։

Հիշեցնենք, որ Հայաստանին որպես օգնություն էր տրամադրվել «Спутник V» պատվաստանյութ՝ 15 հոգու համար, որից մեկը ստացել էր Առողջապահության նախկին նախարար Արսեն Թորոսյանը։

«Պատվաստանյութը [«Спутник V»], հիմնականում, 100 %-ով կանխում է մահացությունը և ծանր կլինիկական դրսևորումը։ Կարող է մարդ վարակվել, թեթև կլինիկա ունենալ, բայց դա չի նշանակում, որ արդյունավետ չէ»,- հունվարի 12-ին հայտնել էր ԱՆ «Հիվանդությունների վերահսկման և կանխարգելման ազգային կենտրոն»-ի (ՀՎԿԱԿ) գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը։

Տես նաև՝

• Կորոնավիրուսի պատվաստանյութ կգնվի բնակչության 10%-ի համար. կոլեկտիվ իմունիտետ դեռ չի ձևավորվել

• Հայաստանում պատվաստանյութերի 1/3 կլինի «AstraZeneca»-ն, որի արդյունավետությունը 70% է

Գլխավոր լուսանկարը՝ Ռուսաստանի ուղղակի ներդրումների հիմնադրամի (ՌՈՒՆՀ)-ի