Հայաստանի սպառողական շուկայում 2021թ. հունիսին 2020թ. հունիսի նկատմամբ 6.5% գնաճ է գրանցվել: Ինչպես վկայում են Վիճակագրական կոմիտեի (ՀՀ ՎԿ) հրապարակած տվյալները, մայիսին տեմպերի որոշակի թուլացումից հետո գնաճը կրկին արագացել է: Մայիսին 12-ամսյա գնաճը կազմել էր 5.9%: 

Հունիսին գրանցված 6.5% գնաճը ոչ միայն ամենաբարձրն է այս տարվա ընթացքում, այլև՝ նախորդ առնվազն 5 տարիների կտրվածքով:  

Հայաստանում գնաճի տեմպերն արագացել են նախորդ տարվա վերջից և այս տարվա սկզբում հատել են Կենտրոնական բանկի նախանշած թիրախի՝ 4%-ի մակարդակը: 

Տարվա առաջին կիսամյակի հաշվարկներով (2021թ. հունվար-հունիսը 2020թ. հունվար-հունիսի համեմատ)` գնաճը կազմել է 5.7%: 

Առավել արագ տեմպերով շարունակում է թանկանալ սննդամթերքը: 

Սնունդը թանկացել է 8.8%-ով

2021թ. հունիսին 2020թ. հունիսի համեմատ հանրապետությունում արձանագրվել է սննդամթերքի և ոչ ալկոհոլային խմիչքի 8.8% գնաճ: 

Մասնավորապես, 

•  բանջարեղենը թանկացել է 17.5%-ով,
•  կաթնամթերքը, պանիրը և ձուն՝ 10.4%-ով, մասնավորապես՝ ձվի գինը բարձրացել է 41.4%-ով,
•  մսամթերքը թանկացել է 6.6%-ով,
•  շաքարը և շաքարավազը՝ 43.2%-ով,
•  յուղերը և ճարպերը՝ 36.5%-ով (արևածաղկի բուսական յուղի միջին գնաճը 2021թ. մայիսին 2020թ. մայիսի համեմատ կազմել է 87.3%)
• ձուկը և ծովամթերքը՝ 20.2%-ով,
• ալկոհոլային խմիչքն ու ծխախոտը՝  8.8%-ով
•  միրգը էժանացել է 9%-ով:

Ոչ պարենային ապրանքները թանկացել են 9.5%-ով

2021-ի հունիսին նախորդ տարվա նույն ամսվա համեմատ Հայաստանի ոչ պարենային ապրանքների շուկայում գրանցվել է 9.5% գնաճ:

Մասնավորապես բենզինը թանկացել է 59.2%-ով, իսկ դիզելային վառելիքը՝ 47.1%-ով:

Իսկ այս տարվա մայիսի համեմատ բենզինի և դիզելային վառելիքի գներն աճել են համապատասխանաբար 6.2% և 4.5%-ով։

Ծառայությունների սակագները բարձրացել են 2.1%-ով

Մատուցված ծառայությունների ոլորտում 2021թ. հունիսին 2020թ. հունիսի համեմատ արձանագրվել է սակագների 2.1%, իսկ 2021թ. մայիսի համեմատ՝ 0.1% հավելաճ: 

 Տես նաև՝

• Գնաճը «չափերն անցնում է». լուրջ ազդակ ԿԲ-ի ու Կառավարության համար
• Գնաճը չի մեղմվում. ԿԲ-ն բարձրացնում է վերաֆինանսավորման տոկոսադրույքը
• Կենտրոնական բանկը կանխատեսում է, որ առաջիկա եռամսյակներում բարձր գնաճը կպահպանվի