Պետական գույքի կառավարման կոմիտեն նախատեսում է հանրակացարանային բնակելի տարածքներում ու բնակելի շենքերում առկա ազատ տարածքները հատկացնել ոչ թե այնտեղ բնակվող ՀՀ քաղաքացիներին, այլ արցախյան 2020թ․ պատերազմի հետևանքով տեղահանված և փաստացի Հայաստանի Հանրապետությունում բնակվող Արցախի քաղաքացիներին։

Կառավարության այս որոշման նախագիծը շրջանառության մեջ է դրվել իրավական ակտերի նախագծերի հրապարակման միասնական կայքում:

2020 թվականին հուլիսի 23-ի որոշմամբ՝ Կառավարությունը նպատակ ուներ բարելավել Պետգույքի կառավարման կոմիտեի ենթակայության տակ գտնվող նախկին հանրակացարանային տարածքներում հաշվառված և փաստացի բնակվող ՀՀ քաղաքացիների բնակարանային պայմանները՝ մասնավորապես հանրակացարանային բնակելի տարածքներում ազատ տարածքների առկայության դեպքում լրացուցիչ առանձնացված սենյակ հատկացնելով։ 

Այժմ Կառավարությունը մտադիր է ուժը կորցրած ճանաչել այս որոշումը, քանի որ ինչպես հայտնում է Պետգույքի կոմիտեն, ներկայում կան բազմաթիվ ընտանիքներ, որոնք առհասարակ զրկված են բնակության վայրից, և ավելի հրատապ և առաջնահերթ է նրանց բնակարանով ապահովելը, քան բարելավել այն քաղաքացիների պայմանները, որոնք արդեն իսկ պետության կողմից ստացել են աջակցություն և ունեն բնակության վայր։

Այսպիսով, Պետական գույքի կառավարման կոմիտեն առաջարկում է հանրակացարանային ազատ տարածքները որպես բարելավում ոչ թե հատկացնել այնտեղ բնակվող ՀՀ քաղաքացիներին, այլ տրամադրել պատերազմի հետևանքով տեղահանված և փաստացի Հայաստանի Հանրապետությունում գտնվող արցախցի ընտանիքներին՝ որպես բնակարանային ապահովության խնդրի լուծում։

Հավելենք, որ նախագիծն օրինական ուժ կստանա միայն Կառավարության հավանությանն արժանանալու դեպքում։

Կարդացե՛ք նաև՝

• Քաշաթաղից տեղահանված 11 ընտանիքի փորձում են դուրս հանել պետական կիսավեր շենքից
• Պետգույքի կառավարման կոմիտեն ասում է՝ քաշաթաղցիները պետք է լքեն կոմիտեին ամրացված շենքը
• Պետգույքի կառավարման կոմիտեն դիմել է ՀԷՑ-ին. պետական շենքում ապրող քաշաթաղցիները օրինական էլեկտրաէներգիա ունեն