Վերակառուցման և զարգացման եվրոպական բանկի (ՎԶԵԲ) նոր կանխատեսումների համաձայն՝ Հայաստանի տնտեսական աճը 2023 և 2024 թվականներին կկազմի 5%։

Կառույցն այսօր` մայիսի 16-ին, հրապարակել է «Տարածաշրջանի տնտեսական հեռանկարները» զեկույցը։ 

Փետրվարին արված կանխատեսումների համեմատ՝ այս անգամ Հայաստանի 2023 թվականի տնտեսական աճի ցուցանիշը բարձրացվել է 1 տոկոսային կետով, իսկ 2024-ինը՝ 0.2 տոկոսային կետով։

Զեկույցում հիշեցվում է, որ 2022 թվականին Հայաստանում գրանցվել է 14.2% տնտեսական աճ։ Արդյունաբերության ոլորտում գրանցվել է 7.8% աճ, իսկ ծառայությունների ոլորտում՝ 28.2%: Կրկնապատկվել է շինարարության և առևտրի աճը։

Ծառայությունների ոլորտը շահել է ոչ ռեզիդենտների պահանջարկի աննախադեպ աճի արդյունքում։ Խոսքը ռուս-ուկրաինական պատերազմից հետո Հայաստան ժամանած ռուսաստանցիների մասին է։ Նրանք մեծ պահանջարկ են ստեղծել հաղորդակցության, զբոսաշրջության, ֆինանսների և ծառայությունների այլ ոլորտներում։

Միևնույն ժամանակ, արտասահմանից դրամական ներհոսքն է մի քանի անգամ աճել։ 2021 թվականի համեմատ տրանսֆերտներն ավելացել են 2.5 անգամ: 

• Ռուսաստանից փողերի ռեկորդային ներհոսքը Հայաստան շարունակվում է

ՎԶԵԲ-ի մասնագետների գնահատմամբ՝ այս տարվա երկրորդ կեսից տնտեսական աճն ավելի դանդաղ տեմպեր կգրանցի, քան տարեսկզբին։

Գնահատվում է, որ նախորդ տարվա ընթացքում դրամավարկային քաղաքականության խստացումը նպաստել է, որ գնաճի տեմպը նվազի։ 2023 թվականի մարտին, նախորդ տարվա նույն ամսվա համեմատ, գնաճը կազմել է 5.4%:

2020 թվականի անկումից հետո Հայաստանի տնտեսությունը սկսել է աճել (տես՝ աղյուսակում Հայաստանի առաջին երեք ցուցանիշը՝ Actual բաժնում)։ Մյուս երեք ցուցանիշը կանխատեսումներն են (Forecast), հաջորդող երկուսը՝ կանխատեսումների փոփոխությունները փետրվարի համեմատ։

Ըստ կանխատեսումների՝ հարևան Վրաստանում ևս 5% տնտեսական աճ է սպասվում: Ադրբեջանի համար կանխատեսվում է 2.5% տնտեսական աճ, Ուկրաինայի համար՝ 1% աճ, իսկ Ռուսաստանում ՝ 1.5% անկում։

«Ակնկալվում է, որ Ուկրաինայի տնտեսությունը համեստորեն կաճի՝ մեկ տոկոսով 2023 թվականին և երեք տոկոսով՝ 2024 թվականին, քանի որ բիզնեսները հարմարվում են պատերազմական պայմաններին»,- նշված է ՎԶԵԲ-ի հաղորդագրության մեջ:

Թուրքիայում 2023 թվականին սպասվում է տնտեսական աճի դանդաղում։ Տարեկան տվյալներով կանխատեսվում է 2.5% աճ: 2023 թվականի փետրվարին Թուրքիայում գրանցված երկրաշարժերը բացասական ազդեցություն են թողնում տնտեսության վրա։

Ընդհանուր առմամբ, ըստ զեկույցի հեղինակների, Եվրոպայում և նրա սահմաններից դուրս գազի բարձր գներն ու ֆինանսավորման խստացված պայմանները նպաստում են գնաճին։ 

Տես նաև՝

• Չնայած երկնիշ տնտեսական աճին՝ վարձու աշխատողների մի մասի կենսամակարդակը էապես նվազել է
• Վաչե Գաբրիելյան. «Տնտեսական աճին կառավարությունն, իհարկե, նպաստել է, սակայն դա չէր կարող երկնիշ աճ ապահովել»