Հակարիի անցակետում Արցախից Հայաստանի Հանրապետություն մուտք գործելիս ադրբեջանցի ուժայինները ձերբակալել են Արցախի Հանրապետության Պաշտպանության բանակի նախկին հրամանատար Լևոն Մնացականյանին։ Այս մասին հաղորդել է ռուսական ТАСС պետական գործակալությունը՝ հղում անելով Մնացականյանի մոտ շրջապատին։

Հիշեցնենք՝ Լևոն Մնացականյանը երկար տարիներ հրամանատարական տարբեր պաշտոններ է զբաղեցրել է Պաշտպանության բանակում, իսկ 2015-2018 թվականներին եղել է Արցախի պաշտպանության նախարարը, Պաշտպանության բանակի հրամանատարը։

Ավելի վաղ՝ Հակարիի անցակետում ադրբեջանցիները ձերբակալել և Բաքու էին տեղափոխել Արցախի նախկին պետնախարար Ռուբեն Վարդանյանին։ Նրան մի քանի դրվագներով մեղադրանք է առաջադրվել։

Սեպտեմբերի 28-ին էլ Արցախի նախագահի նախկին խորհրդական, նախկին արտգործնախարար Դավիթ Բաբայանը հայտարարել էր, որ ինքը նույնպես Ադրբեջանի «սև ցուցակում է», և պետք է գնա Բաքու հետաքննությանը ներկայանալու համար։ Բաբայանը նշել էր, որ այդ նպատակով Ստեփանակերտից գնալու է Շուշի։ Բաբայանի այս հայտարարությունից հետո նրա վերաբերյալ դեռևս ոչ մի տեղեկություն հայտնի չէ։