HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

«Ես ինչ-որ բան չեմ կատարել, որ ներում խնդրեմ»

Դատարանների արխիվում «Հետքը» ուսումնասիրել էր 11 տարի բանտում ցմահ դատապարտյալի կարգավիճակում գտնվող, նախկին շարքային զինվոր, երկկողմանի ծնողազուրկ Ցոլակ Պողոսյանի քրեական գործը: ԱՆ ՔԿՎ պետի թույլտվությամբ մենք եղանք «Նուբարաշեն» քրեակատարողական հիմնարկում, որտեղ ծառայողական սենյակում հանդիպեցինք ու հարցազրույց վարեցինք Ցոլակի հետ, ով մինչ օրս պնդում է, որ չի կատարել համածառայակից Կարեն Պետրոսյանի սպանությունը, պայքարում է գործի վերաբացման համար:

-Ցոլա՛կ, մի քիչ պատմեք Ձեր մասին, որտե՞ղ եք ապրել, ո՞ւմ հետ…

-Ես երկկողմանի ծնողազուրկ եմ, Ռուսաստանում էի ապրում, եկա Հայաստան, մինչև բանակ գնալս ապրում էի եղբորս հետ՝ Բանգլադեշ թաղամասում: Ինքն ինձնից 10 տարի մեծ է, մեր մայրերը տարբեր են, հիմա ինքը Հայաստանում չի: Որպես ծնողազուրկ՝ ինձ մոտիկ տեղ զորակոչեցին՝ Սովետաշենի զորամաս:

-Ովքե՞ր են գալիս Ձեզ այցի:

-Քեռիս ա գալիս: Մի քանի տարի ա, որ իրար հետ կապ կա: Երկու անգամ իր հետ եմ իջել սվիդանի (տեսակցության-հեղ.):

-Քրեական գործում կան ցուցմուքներ, որ Դուք հանգուցյալ Կարեն Պետրոսյանի հետ եղել եք մտերիմ ընկերներ: Ի՞նչ տեղի ունեցավ դեպքի օրը:

-Կարենի հետ նույն վաշտից ենք եղել, հետո իրեն տեղափոխեցին ուրիշ վաշտ: Մենք գնացել էինք զանգելու, երբ եկանք, բոլորը խառնված էին, ասացին, որ ինչ-որ մեկը կախվել ա, բարձրացանք տանիք, տեսանք, որ Կարենն ա: Շոկի մեջ էինք, չէինք պատկերացնում, թե ինչ է կատարվել ու ինչու...

-Կան դատավարության ժամանակ տրված ցուցմունքներ, երբ Դուք նշում եք, որ ծեծի-ջարդի միջոցով է կորզվել նախկին ինքնախոստովանական ցուցմունքը:

-Քննիչը գրել ա հայերեն, ես էլ քանի որ հայերեն չեմ տիրապետում, Ռուսաստանում ապրելով՝ ռուսական կրթություն եմ ստացել, ասել եմ, որ չեմ հասկանում իր գրածը, պահանջել եմ թարգմանիչ, հետո փաստաբան, բայց ոչ փաստաբան էր գալիս, ոչ թարգմանիչ: Ծեծի ազդեցության տակ ստիպել են, որ ստորագրեմ ցուցմունքի տակ՝ չգիտակցելով, թե ինչ ա գրված, ստորագրել եմ: Շոկի մեջ, իրենցից պրծնելու համար եմ ստորագրել:

-Քանի՞ օր մնացիք ռազմական ոստիկանությունում:

-Չորս օր պահեցին: 

-Ցոլա՛կ, դատարանում Ձեր ասած բառերն են, որ ոչ թե ծեծում, այլ «սամասուդ» էին անում: Ի՞նչպես եք ընդունվել մեկուսարան, զննե՞լ է բժիշկը:

-Ցանկացած մարդու էլ պարզ ա, թե ինչ կարող են անել ոստիկանությունում, թե ինչի են ընդունակ, որպեսզի կարողանան նորմալ, գիտակցող մարդուն էնպես հեղափոխեն, որ նա տա իրենց ուզած ցուցմունքը: Ինչ վերաբերում ա ծեծին, բոլորն էլ գիտեն, թե ոստիկանությունում ոնց կարող են ծեծել, բառերով բացատրելու բան չի: Երբ բերդ բերեցին, կապտուկներ կային իմ վրա, արձանագրեցին ամեն ինչ, երևի կցված ա գործիս: Էստեղ ես փոխեցի իմ ցուցմունքը, քանի որ ինձ ապահով զգացի. իրենց խոշտանգումների մեջ չէի: Մի ադվակատ բերեցին պետպատվերով (Ցոլակ Պողոսյանը միջոցներ չի ունեցել փաստաբան վարձելու-հեղ.), իբր նա պիտի իմ շահերը ներկայացներ, բայց մի երկու անգամ նրա հետ խոսելուց հետո հասկացա, որ նա վստահելի չի, ոչ թե իմ շահերն էր պաշտպանում, այլ դատախազության: Ասում էր՝ ինչի վիզ չես վերցնում, որ դու ես…Կարենը եղել էր կուբախտում, թե ինչի էր նա մահից մի քանի օր առաջ էնտեղ հայտնվել, ինչի՞ էր նրան ծեծել աֆիցերը, ինչի՞ նրան չէին հարցաքննել: Էդ հարցերը չէր բարձրացնում պաշտպանը: Մենակ հիմնվել էին նրա վրա, որ ես տվել եմ խոստովանական ցուցմունք, բայց իրենց հարց չեն տվել, թե էդ ցուցմունքը իմ հոժար կամքով եմ տվել, թե խոշտանգումների հետևանքով: Լոգիկայի մեջ էլ չի տեղավորվում. ինչ անխիղճ պիտի լինես, ինչ սատանայական նստվածք պիտի ունենաս, որ չգիտակցես, թե ինչ ես անում: Մոտիկ տղա էր ինձ Կարենը: Ոստիկանության վրա եմ զարմացած. ո՞նց կարող ա գործը չկարողանան բացահայտել ու բարդեն մեկի վրա, հետո էլ նստացնեն ցմահ, մարդու կյանքը փչացնեն: Մինչև կախվելը Կարենի վրա վնասվածքներ են եղել՝ գլխի սալջարդ, կապտուկներ, մեջքի հարվածներ: Բայց դա եղել ա երեք օր առաջ Երկրապահի տղաների հետ կռվի ժամանակ, որը կա դատաբժշկական փորձաքննության մեջ: Փորձաքննության մեջ նշված ա նաև, որ դեպքի օրն էլ են եղել հարվածներ, որ համոզիչ լինի, որ ես, իբր, Կարենին ծեծել եմ, հետո կախել:  Պատկերացում չունեի, որ ինձ կարող ա ցմահ դատապարտեն: Մտածում էի, որ մարդիկ կհայտնվեն, որ կկարողանան ապացուցել, որ անմեղ եմ: Հետո երբ կարդացին ցմահ, չէի էլ պատկերացնում, թե դա ինչ ա: Ցմահ, այսինքն, մինչ կյանքիդ վերջը պիտի մնաս բանտում: Բայց դեռ չէի գիտակցում: Բարձրացրին 5-րդ հարկ: Նորմալ մարդիկ էին, որտեղ ինձ բերեցին: Խցում ինձնից մեծ էին, ամենափոքրը ես էի:

-Դուք ինքնուրույն վերաքննիչ բողոք եք գրել, թղթի վրա ձեռագիր ռուսերենով ներկայացրել եք նաև Վճռաբեկ բողոք՝ չունենալով փաստաբան:

-Հիասթափություն ապրեցի, գալադովկա էի անում, բողոքում էի քրեական գործիցս, բայց ոչինչ չէր փոխվում: Իսկ Եվրոպական դատարան դիմելու համար առաջնահերթ պիտի փաստաբան ունենաս, որ կարողանաս կարգով դիմել: Ես մենակ եմ, ի՞նչ կարող եմ անել:

-Երբ եկաք բանտ, 21 տարեկան չկայիք, հիմա 32 տարեկան եք: Ո՞նց ապրեցիք այս 11 տարիներին: Ինչո՞վ եք զբաղվում: Կուզեի՞ք աշխատել, ընտանիք կազմել…

-Զբաղմունք գտնում ենք, հեռուստացույց… Բերդի գրադարանի բոլոր գրքերը կարդացել եմ, հիմա, որ գիրք եմ ուզում, նորից իմ կարդացածներն են բերում:

-Ռուսերե՞ն եք կարդում, թե՞ հայերեն:

-Հայերեն չեմ կարողանում, ռուսերեն եմ կարդում:

-Անգամ երբ հարազատ մարդիկ երկար փակ տարածքում մնան հաստատ կլինեն անհամաձայնություններ…

-Դե՛, որ ընտանիքում վեճեր չեն լինում, լինում են, բայց էնպես չի, որ, ինչպես ասում են, դառը արցունքների բերեն: Նորմալ ա… Չորս հոգով ենք խցում, բոլորս էլ նույն տարիքի տղերք ենք, հիմնականում զինվորական գործերով ցմահ նստած:

-Կա՞ սպորտով զբաղվելու հնարավորություն:

-Սպորտզալ չկա, բայց կարող ես ինքնուրույն խցում զբաղվել, մարզանք անել առավոտները:

-Զբոսանքը, եթե չեմ սխալվում, դարձյալ նույնն խուցն է, ուղղակի վերևում ճաղեր:

-Նույն չորս պատն ա, ուղղակի վերևում բաց ա: Եթե մեզ մնա, լավ կլինի խցում ճաղերի տեղը լուսամուտ լինի, զբոսանքին դուրս գանք, ման գանք մաքուր օդին: Բայց էն, ինչ օրենքով տրվում է, բողոքելու տեղիք չի տալիս:

-Նշեցիք հացադուլների մասին: Ինչ-որ արդյունք տվե՞լ են այդ հացադուլները:

-Ոչ մի արդյունքի չեմ հասել: Շատ անգամ եմ արել, մի անգամ 28 օր մնացել եմ հացադուլի մեջ:

-Շատ են քրեական գործերց բողոքները: Բայց որևէ տեղաշարժ չկա: Եթե Ձեզնից կախված լիներ ինչ-որ լուծում, ի՞նչ կանեիք:

-Երբ ասում են ցմահ բանտարկյալ, դրսի մարդիկ ուրիշ ձև են պատկերացում: Մտածում են՝ երևի մարդակեր են: Չէ՛, ուզում եմ ասեմ, որ էդպես չի: Նույն մարդն ա, ուղղակի հայտնվել ա ճաղերի հետևում: Կարելի ա տալ հնարավորություն ուղղվելու միջոցով վերադառնալ: Ոչ թե ես ցմահ բանտարկյալ եմ դրա համար եմ ասում, այլ էդպես ա: Ես էլ, որ ազատության մեջ էի էդպես էի պատկերացնում, որ ցմահ բանտարկյալները սարսափելի են: Մարդուն պետք ա հույս տան, որ երկարաժամկետ ուղղվելու դեպքում կարողանա դուրս գալ ազատություն:

-Ցոլա՛կ, իսկ ի՞նչ է անում համակարգը, որպեսզի բանտից մարդ դուրս գա մտքով, հոգով, մարմնով առողջ քաղաքացի, որպեսզի բանտում անցկացրած ամեն օրվա տառապանքի համար մեկին չվնասի դրսում:

-Ամենասարսափելին այն է, որ էստեղի մարդկանց ներշնչում են, որ իրենք մեկուսացված են հասարակությունից: Իրենք են սարքում գազան, հետո էլ դժգոհում են, ասում են՝ ինչու էս մարդը գազան դարձավ: Դուք եք դարձնում նրան գազան: Եթե մարդն անմեղ ա, բայց ընկնում ա ճաղերից էս կողմ, դուք իրեն դրդում եք, որ ինքը դառնա էն, ինչ դուք եք ուզում տեսնել: Բայց եթե մարդը կամքից ուժեղ եղավ, չի փոխվի:

-Ճաղերից դուրս ո՞նց եք պատկերացնում Ձեր ապագան:

-Մարդուն թող հույս տան, որ մարդ էստեղից դուրս գալու հնարավորութուն կունենա, էդ ժամանակ արդեն կպատկերացնենք մեր ապագան, կմտածենք, որ լքված չենք: Թե ով, ինչ կանի հետո, արդեն կոնկրետ մարդուց ա գալիս:

-Հետո կմտածե՞ք արդարացման դատավճռի հասնելու մասին: Կպաքարե՞ք, որպեսզի ապացուցվի Ձեր անմեղությունը:

-Մենակ պայքարելը քիչ ա: Պայքարելու հետ մեկտեղ, պիտի միջոցներ ունենաս, որ կարողանաս քո պայքարը առաջ տանել:

-Ինչի՞ն եք հավատում:

-Հավատում եմ Աստծուն, կարող ա մի օր դուռ բացվի:

-Ներման խնդրագիր երբևէ գրե՞լ եք նախագահին:

-Չեմ գրել, դրա կարիքն էլ չեմ զգացել, ես ինչ-որ բան չեմ կատարել, որ ներում խնդրեմ: Բայց շատ բողոքել եմ, որ անարդարացի եմ հայտնվել բանտում:


-Շա՞տ կան մարդիկ, ովքեր Ձեր պես պնդում են, որ սխալի հետևանքով են հայտնվել այստեղ:

-Կամեռում երկու հոգի կան, զինվորներ, ովքեր պնդում են, որ իրենք մեղավոր չեն, բայց մեր ձայնը ոչ մի տեղ չի հասնում: Մեր գործերի գլխավոր սարքոցին Ջհանգիրյանի կողմից է եղել: Ջհանգիրյանին էլ ո՞վ չգիտի, բոլորը գիտեն, որ երեք տղաների էլ ցմահ դատավճիռ տվեցին, բայց հետո ազատվեցին: Ջհանգիրյանը սխալվել էր փաստորեն:

-Պարոն Ջհանգիրյանի հետ հարցազրույց եմ վարել, խոսել նաև Ձեր գործի մասին, լավ հիշում էր, գտնում էր, որ ամեն ինչ արդարացի է եղել, համոզված էր, որ Դուք եք կատարել սպանությունը: Իսկ Ձեր կարծիքով Կարենի դեպքը զուտ ինքնասպանությո՞ւն էր:

-Կոնկրետ վարկած չունեմ, բայց ավելի շուտ ինքնասպանություն էր: Չեմ կասկածում մեկին, ով կարող էր սպանել Կարենին:

-Կա՞ մի բան որի մասին ես չհարցրեցի…

-Եթե կարող է իմ խոսքը հասնել ազդեցիկ մարդկանց, թեկուզ վերաքննություն անեն գործով, հաստատ ինչ-որ մի բան կգտնեն, որը կկարողանա ապացուցել իմ անմեղությունը: Ես միջոցներ չունեմ, որ փաստաբան վարձեմ… Շատ ցավալի ա, որ հայտնվել եմ ցմահ դատապարտյալի կարգավիճակում, կուզեի էս իրավիճակից դուրս գալու միջոց գտնեինք: Էստեղ շատ կան մարդիկ, որ դրա կարիքը ունեն: Մի տրուպով (մեկ մարդու սպանությամբ-հեղ.) մարդիկ շատ կան, բանակի գործեր կան, անարդարացի դատավճիռներ: Եթե օրենք փոխվի կամ հետքննություն արվեն էդ գործերը...Մի տրուպով, առաջին դատվածությամբ մարդկանց տվել են ցմահ ազատազրկում: Էդպես ցմա՞հ են պատժում մարդուն: Կարող ա անգամ ինքն էլ մեղավոր չի: 18 տարեկանից, 20 տարեկանից ռեալ չի մարդուն ցմահ փակել, կարող ա էդ մարդը փոխվելու ընդունկություն ունի: Իսկ փակելով ցմահ՝ մարդուն չես տալիս հնարավորություն, որ ներկայացնի հանրությանը, որ ինքը էդ մարդը չի:  

Լուսանկարները՝ Նարեկ Ալեքսանյանի

Մեկնաբանություններ (20)

ԱԼԻԿ
Որ կողմից նայում ես վատ է:Ամեն դեպքում հույսով եմ էս գործում մի բան կփոխվի:Ապրես Զարուհի:
Զարուհի
Այսքան քրեական գործ եմ ուսումասիրել, բայց Ցոլակի գործը անտանելի է ազդել իմ վրա: Այնքան ակնհայտ է, որ թույլ օղակ են գտել իրենց համար ու ամեն ինչ բարդել նրա վրա: Այս տղան չի ունեցել փաստաբան, չի ունեցել թարգմանիչ, չի ունեցել ծնողներ, չի ունեցել ոչինչ: Մեն-մենակ է մնացել առաջ: Բայց եթե գտնվեն նվիրված փաստաբաններ, ովքեր անշահախնդիր կարող են ուսումնասիրել այս 4 հատորանոց խղճուկ քրեական գործը, ամեն ինչ կարող է փոխվել: Ինչպես իմ կողմից շատ հարգված Հայկ Ալումյանն է ասում՝ ամեն ինչ սկսվում է փաստաբանից: Եթե մի լրատվամիջոց կարողանում է մտնել արխիվներ ու փոշիների միջից հանրությանը ներկայացնել տասնյակ տարիներ առաջվա սարսափները, ապա մասնագետներն ու պետական համակարգերը կարող են ու կարող են: Մեր գործը պիտի շարունակվի այլ ատյաններում:
Զարուհի
Հարգելի Վարազ Սյունի, խոսքը ներկայի մասին չէ, միգուցե հիմա գիտի, բայց այն, որ նախաքննության ժամանակ թարգմանչի կարիք է զգացել, ակնհայտ է: Ու հենց դա խախտում է, քանի որ մարդը պահանջել է թարգմանիչ ու իրեն չեն տրամադրել: Թարգմանիչը տրամադրվել է միայն դատավարության ժամանակ:
Վարազ Սյունի (Ամստերդամ)
Մյուս կողմից ինձ զարմացնում է,որ այսքան տարի բանտում հայերեն գրել-կարդալ չսովորեց. ցանկության,թե՞ հնարավորության խնդիր է:
Զարուհի
Հարգելի Վահե Մելքոնյան, վերևում ես գրել եմ, որ կարելի է փաստաբան վարձել Ցոլակ Պողոսյանի գործը ուսումնասիրելու համար: Հիմա այդ ուղղությամբ ենք մտածում: Գործի վերաբացման միակ հիմքը այսքան տարիներ անց կարող է լինել նոր երևան եկած հանգամանքը: Միգուցե փաստաբանը գործում գտնի մի այնպիսի թել, որով շարժվելով կարողանանք վերաբացել գործը: Բացի այդ, կարելի է նրան ինչ-որ աշխատանք առաջարկել, բայց չգիտեմ՝ ինչ կարող է նա անել փակի տակ, մտածում եմ՝ իրեն գումար ուղարկվի կամ սնունդ ու ռուսերեն գրքեր տարվի, որովհետև քանի որ հարազատներ չունի, իր մոտ գնացող չի լինում: 2 անգամ քեռին է գնացել հանդիպման: Եթե ցանկանում եք մի բան առաջարկել, խնդրում եմ զանգեք մեր խմբագրություն կամ գրեք մեզ: Շնորհակալություն...
Vahe Melkonyan
Lav sagh hech, philisophayutyun' mi koghm, es eritasardin voca kareli real ognel, baci sirun xosaluts.
Պավլիկ Սարգսյան
Հարգելի Պետրոս` Ցոլակը խեղճ տղա չէ, նա կարգին, կազմակերպված, արժանավոր, ազնիվ, խելացի, բարի, ամուր կամքով և լուսավոր մարդ է, բայց համակարգը խեղել ու կործանել է նրա` հայրենիքի զինվորի, կյանքն ու ճակատագիրը` խեղճն ու ողորմելին նրանք են:
Պետրոս
Հարգելի Պավլիկ, դուք երեւի ավելի ճիշտ եք: Բայց ինձ թվում է որ մարդը թասբի է գցել անաստվածներին, բալքի մի բանով օգնած լինի էդ խեղճ տղային:
Պավլիկ Սարգսյան
Հարգելի Գևորգ` ոչ թէ գործն է խարան դատաիրավական համակարգի համար, այլ դատաիրավական համակարգը, իշխանական կառույցներն ու ողջ համակարգն է խարան պետականության, ազգի, հասարակության և մեր պատմության համար: Իմ խոնհարումը և ի խորոց սրտի շնորհակալությոնը խմբագրությանը և հարկապես ԶԱՐՈՒՀՈՒՆ` պետական և հասարակական շատ կարևոր ու մեծ նշանակություն ունեցող և հրատապ լուծում պահանջող հարցի բարձրացման և հանրային քննարկման համար, նման խեղված ճակատագրեր` մեր շրջապատում, ամենուր են, պետք է կանխել այս քրեաօլիգարխիկ պետական հանցախմբի հակապետական, հակամարդկային, հակաժողովրդական գործունեությունը և բոլորին դատել մարդկության, պետության և ազգի դեմ գործած հանցանքների մեղադրանքով:
Վարազ Սյունի (Ամստերդամ)
Հարգելի Զարուհի (10) -Համաձայն եմ: Երդվյալ ատենակալներով դատավարությունն էլ անթերի չէ,բայց ինչպես դուք եք իրավացիորեն նշում՝ «մեկ դատավորի վրա ազդելու մեխանիզմները ավելի շատ են, քան ինը կամ տասնմեկ ատենակալների»:Սա՛ է հայաստանյան ներկա իրավիճակում ողջ տարբերությունը: Ժուրիով դատավարության ՆՊԱՏԱԿՆ այն է(ր),որ պետության (դատարանների) ու անհատի միջև լինի բուֆերային գոտի՝ժուրի՝որպես դատարաններին ԶՍՊՈՂ միջոց:Երկրորդ՝ Հայաստանում էլ (գոնե առաջին ատյանի) դատավորները պիտի ընտրվեն ժողովրդի կողմից՝ամեն 4 տարի:
Զարուհի
Հարգելի Վարազ Սյունի, ՀՀ առաջին Սահմանադրությամբ, ի դեպ, նախատեսված եղել է երդվյալ ատենակալների ինստիտուտը, հետո հանվել է: Շատ իրավաբանների հետ հարցազրույց եմ արել, որոշները կողմ են այդ համակարգին, որոշները` դեմ: Հիմնականում պետական համակարգերում են դեմ, ասում են, որ խնամի-ծանոթներ էլի կգտնեն ատենակալների մեջ: Բայց, կարծում եմ, մեկ դատավորի վրա ազդելու մեխանիզմները ավելի շատ են, քան ինը կամ տասնմեկ ատենակալների: Չնայած ժյուրիով համակարգում էլ են լինում սխալներ: Օրինակ` ԱՄՆ-ում: Կարդացեք իմ այս նյութը http://hetq.am/arm/news/33125/30-tari-bantum-chkatarats-hancanqi-hamar.html
ՏԱԹև
ես զարմանում եմ դուք երեխա չունեք???ինչի եիք ուղարկում բանակ.ծնողազուրկ երեխաին???դուք խիղճ ունեք թե չե????ԱՅ ՍԵՐԺ ՍԱՐԳՍՅԱՆ .......
susanna
TQEM DER DATAIRAVAKAN HAMAKARQI VRA, SADRICHNER.
Վարազ Սյունի (Ամստերդամ)
Այսպիսի (հերթական) ցնցող-անարդար պատմություն կարդալուց մարդ մտածում է՝ էլ ի՞ նչ եք սաղ աշխարհով մեկ գենոցիդ-գենոցիդ գոռգռում,երբ քո հայրենակցին ՆՈՒՅՆ ձևով ես վերաբերում: Երկրորդ՝ սրա՛ լուծումն էլ կա. ԺՈՒՐԻՈՎ (հատկապես քրեական) դատավարություն:Այսինքն՝ մեղադրյալի մեղավոր/չմեղավոր լինելը որոշում է տարբեր քաղաքացիներից կազմված ժուրին՝դատավարության փաստերի հիման վրա:
Zaruhi
համոզված եմ,որ այս շարքը մանրակրկիտ կարդացվում է և դատախազությունում և արդարադատությունն ապահովելու համար ստեղծված մյուս ատյաններում.....կարծում եմ,որ իրանց ուղիղ պարտականությունն է արձագանքել նման աղաղակող քրեական գործերին....վաղուց եկել է ժամանակը..
Զարուհի
Հարգելի Նունե, շնորհակալություն արձագանքելու համար: Մեր հրապարակումներին արձագանքում են փաստաբաններ, քաղաքացիներ, մարդիկ պատրաստակամություն են հայտնում դրամահավաք անել ու փաստաբան վարձել, որպեսզի ուսումնասիրեն գործերը: Իսկ պետական կառույցներից ԱԺ-ում են արձագանքել, որոշման նախագիժ է կազմվել, որպեսզի պետաիրավական հանձնաժողովում ստեղծվի աշխատանքային խումբ ու ուսումնասիրվեն գործերը: ՄԻՊ Կարեն Ադրեասյանը օրիիագծերի առաջարկներով է հանդես եկել: Նաև համառ լուսաբանումներիս արդյունքում, Քրեական դատավարության նոր օրենսգրքի նախագծում տեղ գտավ 100 հոդվածի 2-րդ կետը, ըստ որի` կյանքի դեմ ուղղված հանցագործությունների պարագայում իրեղեն ապացույցները ենթակա են պահպանման: Բայց ամենակարևոր արդյունքը կլինի այն, որ անմեղ մարդ վերադառնա ազատություն: Պայքարը պետք է հետևողական շարունակել:
Նունե
Հարգելի Հետք, անչափ կարևոր գործ եք նախաձեռնել, ես մշտապես հետևում եմ այս շարքին: Խնդրում եմ տեղեկացրեք, արդյոք ձեր հրապարակումներից հետո, կա արձագանք պետական մարմիններում գործերը վերաքննելու համար: Շնորհակալություն:
ՈւՇԱԴՐՈՒԹՅՈՒՆ!
ԱՅՍ ԳՈՐԾՆ ԱԿՆՀԱՅՏ ԽԱՐԱՆ Է ԱՄԲՈՂՋ ՀԱՅ ԴԱՏԱ-ԻՐԱՎԱԿԱՆ ՀԱՄԱԿԱՐԳԻՆ: Միանգամայն անպաշտպան մարդուն տանջելով, խաբելով ստիպել են ստորագրել իր մահավճռի տակ, նույնիսկ տեղյակ չպահելով թե ինչ է ստորագրում (!) Կարող էին թարգմանությունը տային իրեն (նոտարով հաստատված), կարող էին իր ցուցմունքը իր իմացած լեզվով գրել: Վերջապես, եթե ինքը խոստովանություն է կատարել ապա թող իր ձեռքով ու իմացած լեզվով գրեր: Ցուգմունքը կարող է գրվել քննիչի ձեռքով եթե քննվողը դրան համաձայն է ու չի առարկում, կամ ինքն է խնդրում (!!) Սա ես լավ եմ հիշում, քանի որ ինձ հետ է պատահել, ես խնդրեցի քննիչին որ ցույց տա այն նորմը, ըստ որի ես ինքս չեմ կարող գրել իմ ցուցմունքը: Քաղաքավարի մարդ էր - բացատրեց որ դա միայն իր օգնությունն է - եթե գրագետ ես, խնդրեմ, ինքդ գրիր: Գոնե հաշվի են առնում, կամ պատկերացնում են հանրապետության ղեկավար կոչվող այրերը, արդարադատության գեներալ-գնդապետները, թե ինչպես կնկալվի այս պատմությունը ՄԻՋԱԶԳԱՅԻՆ ՀԱՆՐՈՒԹՅԱՆ ՄԵՋ եթե այն կախվի Ի-ՆԵՏ -ում, անգլերեն, ռուսերեն ու այլ լեզուներով շարադրված! Կարծում եմ, պիտի շտապեն խելոքները, գուցե դեռ հասցնեն մեղմել նման խայտառակությունը! (Գեւորգ)
sofa
ov mardkayin ardarutun, tog vor tqem qo chakatin,,,,Astvats ognakan
Ման Ալեքս
Հարգում եմ Ձեզ, Ձեր արած գործը,, որ մնացածի նման անտարբեր չեք անցնում ու պայքարում եք:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter