Վերաքննիչ քրեական դատարանը, նախագահությամբ դատավոր Մհեր Արղամանյանի, կազմով դատավորներ Ալեքսանդր Ազարյանի և Նարինե Հովակիմյանի, քիչ առաջ բավարարել է փաստաբան Հրանտ Անանյանի բողոքը, բեկանել Քննչական կոմիտեի Էրեբունու քննչական բաժնի ավագ քննիչ Միքայել Զադոյանի վերաբերյալ մեղադրական դատավճիռը, նրան ճանաչել անպարտ ու արդարացրել։ Այս մասին «Հետք»-ի հետ զրույցում ասաց Հրանտ Անանյանը։

Մոտ մեկ տարի առաջ կաշառք ստանալու մեջ մեղադրվող Զադոյանը Երևան քաղաքի ընդհանուր իրավասության դատարանի դատավոր Մեսրոպ Մակյանի դատավճռով մեղավոր էր ճանաչվել ու դատապարտվել 7 տարի ժամկետով ազատազրկման, որի դեմ Հրանտ Անանյանը վերաքննիչ բողոք էր ներկայացրել։

Կաշառքի վերաբերյալ Ազգային անվտանգության ծառայությունում հաղորդում էր տվել քաղաքացի Բաբկեն Գասպարյանը: Վերջինս, մասնավորապես, ասել է, որ որդու մասնակցությամբ քրեական գործի շրջանակներում փաստաբան Գայանե Գալոյանի միջոցով 3000 ԱՄՆ դոլար կաշառք է տվել Էրեբունու քննչական բաժնում։ Հարուցված քրեական գործի շրջանակներում ամբաստանյալի աթոռին էր հայտնվել հենց ինքը` ԱԱԾ-ում հաղորդում տված Բաբկեն Գասպարյանը, փաստաբան Գայանե Գալոյանը, Էրեբունու քննչական բաժնի պետի տեղակալ Բունիաթ Եղիազարյանը և Միքայել Զադոյանն, որը Բաբկեն Գասպարյանի որդու գործով քննիչն է եղել:

Առաջին ատյանի դատարանը առանձնապես խոշոր չափով կաշառք տալու մեջ մեղավոր էր ճանաչել նաև Բաբկեն Գասպարյանին, նրան դատապարտեց 3.5 տարի ազատազրկման և համաներմամբ նրա նկատմամբ դադարեցվեց քրեական հետապնդումը։ Փաստաբան Գայանե Գալոյանին մեղսագրվող կաշառք ստանալու օժանդակությունը վերաորակվել էր կաշառքի միջնորդության: Նրա նկատմամբ ևս քրեական հետապնդումը համաներման հիմքով դադարեցվել էր։

Բունիաթ Եղիազարյանի վերաբերյալ գործը քննվել է առանձին, ավելի վաղ վերջինս նույնպես արդարացվել է։ Դատախազությունը, թեև բողոքարկել է նրա վերաբերյալ դատավճիռը՝ Վերաքննիչ դատարանում հրաժարվել է բողոքից, որից հետո նրա կասեցված լիազորությունները վերականգնվել են, նա նորից աշխատանքի է անցել Քննչական կոմիտեում։

Ստացվում է, որ կաշառքի գործով անցնող երկու քննիչներն էլ  արդարացվել են, և մեղավոր են ճանաչվել միայն ԱԱԾ-ում հաղորդում ներկայացնող անձն ու վերջինիս փաստաբանը։

Նշենք, որ քննիչ Միքայել Զադոյանը գործի քննության ընթացքում 1  տարի, 4 ամիս գտնվել է կալանքի տակ, սակայն այժմ ազատության մեջ էր։ Նրա խափանման միջոցը գրավով էր փոխվել առաջին ատյանի դատարանի կայացրած դատավճռից մի քանի ամիս առաջ, և չնայած դատարանը Զադոյանին հետագայում դատապարտել էր 7 տարի ազատազրկման՝ որոշել էր նրա նկատմամբ ընտրված խափանման միջոց գրավը թողնել անփոփոխ մինչև դատավճռի օրիանական ուժի մեջ մտնելը։