«Պատիվ ունեմ» դաշինքի ԶԼՄ-ների հետ կապերի պատասխանատու Սոս Հակոբյանը ֆեյսբուքյան իր էջում հայտնում է, որ Ազատության հրապարակից բերման են ենթարկվել քաղաքացիներ։

«Ոստիկանության բացարձակ ապօրինի գործողությունների արդյունքում բերման ենթարկվեցին մեր պայքարի մի շարք ընկերներ: Շատ արագ սպասում ենք նրանց՝ մեզ նորից միանալուն»,- գրել է նա։

Հիշեցնենք, որ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը այսօր՝ ապրիլի 17-ին, քաղաքացիներին կոչ էր արել գնալ Ազատության հրապարակ:

«Ես այժմ գտնվում եմ Ազատության հրապարակում և կարծում եմ` եկել է այն կրիտիկական պահը, որ այլևս հոդվածներ գրելով, ելույթներ ունենալով, ֆեյսբուքում ինչ-որ ստատուսներ գրելով որևէ բանի չես կարող հասնել: Վերջին օրերին այս իշխանությունների կողմից արվող արտահայտությունները, մատուցվող տեղեկատվությունը, որ փորձում են հրամցնել մեր ժողովրդին, խոսում է այն մասին, որ նրանք արդեն համակերպվել են Արցախի կորստի հետ ու պատրաստ են Արցախն ամբողջությամբ հանձնել թշնամուն: Եվ հասնում ենք մի հանգրվանի, որ խնդիր ունենք Հայաստանի անվտանգության հետ»,- ասել էր ԱԱԾ նախկին տնօրենը ֆեյսբուքյան ուղիղ եթերի ժամանակ։

Վանեցյանը հայտարարեց` չի գնալու տուն, մնալու է Ազատության հրապարակում` կոչ անելով հայրենակիցներին միանալ իրեն:

«Ուզում եմ շփվել յուրաքանչյուրիդ հետ, խոսենք, հասկանանք՝ ինչ պետք է անենք: Հարգելի հայրենակիցներ, ես չեմ գնալու որևէ տեղ, խնդրում եմ եկեք Ազատության հրապարակ: Եկեք միասին համախմբվենք, հզորանանաք ու պայքարենք՝ հանուն Հայաստանի ու Արցախի, հանուն հայ լինելու»,- ասաց նա:

Հիշեցնենք, որ կառավարության գործունեության զեկույցի խորհրդարանական քննարկմանը վարչապետ Նիկոլ Փաշինյանը հայտարարեց, թե միջազգային հանրությունը պահանջում է ԼՂ կարգավիճակում հարցում նշաձողի իջեցում: Այս ելույթից հետո ՔՊ-ական պատգամավոր Վիգեն Խաչատրյանը հայտարարեց, որ 90-ականներին գոյություն ունեցող այն թեզը, որ Արցախն Ադրբեջանի կազմում ապագա չունի, ըստ իրեն, ճիշտ չէ:

Արցախի խորհրդարանը հայտարարության տեսքով արձագանքեց Հայաստանի իշխանություններին` կոչ անելով «հրաժարվել ներկայիս աղետալի դիրքորոշումից»: Խորհրդարանական ընդդիմությունը ողջունեց Արցախի խորհրդարանի հայտարարությունը` ասելով, թե իրենց ժամանակ է պետք՝ հստակ գործողություններ մշակելու համար: