HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տրդատ Մուշեղյան

Օպերայի հարակից տարածքից ոստիկանություն է տարվել 16 քաղաքացի

Օպերայի հարակից սրճարանների ապամոնտաժման դեմ բողոքող քաղաքացիներից 16-ը բերվել են ոստիկանական բաժանմունք: Այս մասին «Հետք»-ին հայտնեցին ոստիկանության լրատվական ծառայությունից: 

Ցուցարարները ոստիկանական բաժանմունք են տարվել «Վարչական իրավախախտումների վերաբերյալ» օրենսգրքի 182-րդ հոդվածի հիմքով, այն է՝ ոստիկանության զորքերի զինծառայողի կամ ոստիկանության զինծառայողի օրինական պահանջը չկատարելը:

Ոստիկանության լրատվական ծառայության փոխանցմամբ՝ վարչական իրավախախտման վերաբերյալ արձանագրություն կազմելուց հետո քաղաքացիները ազատ կարձակվեն:

Հիշեցնենք, որ Օպերային հարակից սրճարանների աշխատակիցները՝ ի նշան քաղաքապետարանի կողմից իրենց սրճարանները ապամոնտաժելու դեմ բողոքի փակել էին Մաշտոցի պողոտան, ապա՝ Թումանյան փողոցը: Ոստիկաններին հաջողվել էր փողոցները բացել և վերականգնել երթևեկությունը: 

Երևանի քաղաքապետարանը Օպերային հարակից սրճարանների ապամոնտաժումը սկսել էր երեկ՝ մարտի 14-ին, սակայն սրճարանների աշխատակիցները կրկին բողոքի ակցիա էին արել՝ թույլ չտալով ապամոնտաժում կատարել: Կենտրոն վարչական շրջանի ղեկավար Վիկտոր Մնացականյանի առաջարկով քննարկումը տեղափոխվեց քաղաքապետարան, սակայն քննարկման ավարտից հետո Մնացականյանը հայտնեց՝ ապամոնտաժմանն այլընտրանք չկա: 

Քաղաքապետ Հայկ Մարությանը իր ֆեյսբուք էջում գրել է, որ իրենք «ազատագրում են Օպերայի շրջակայքը և հետ բերում մշակութային օջախի մթնոլորտը»:

Վիկտոր Մնացականյանը հայտնեց, որ Մարությանը չի կարող ժամանել, քանի որ արարողակարգի համաձայն՝ ուղեկցում է Հայաստանում գտնվող Վրաստանի նախագահ Սալոմե Զուրաբիշվիլիին:

Այս պահին սրճարանների ներկայացուցիչները զրուցում են Վիկտոր Մնացականյանի հետ: Տարածքում են նաև ԲՀԿ խմբակցության պատգամավորներ Նաիրա Զոհրաբյանն ու Արման Աբովյանը, ինչպես նաև Երևանի ավագանու մի քանի անդամներ: Զոհրաբյանը Մնացականյանին կոչ արեց կրկին բանակցությունների սեղանին նստել սրճարանատերերի հետ:

Մեկնաբանություններ (1)

Robert Davidian 2019-03-14T16:00:50+04:00
"Mayor Hayk Marutyan writes that the city is 'liberating the Opera Square vicinity and returning its cultural atmosphere.'" Was there any other reason for demolishing these cafés? Are they oligarch owned and operated in a corrupt manner?

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։