ՀԴՄ-ների գնման Կառավարության գաղտնի որոշումները գաղտնազերծվել են․ 10-օրյա ժամկետում դրանք կհրապարակվեն
Պետական եկամուտների կոմիտեն գաղտնազերծել է ՀԴՄ սարքերի գնման գործընթացի կազմակերպումը, դրա արդյունքում՝ պայմանագրերի կնքումը կարգավորող Կառավարության գաղտնի որոշումները։ Այս մասին «Հետք»-ին գրությամբ հայտնել է կոմիտեն։
ՊԵԿ-ից պարզաբանեցին, որ գաղտնազերծված որոշումները «Հետք»-ին կտրամադրեն 10-օրյա ժամկետում։ Որոշումները գաղտնազերծվել են Կառավարության նիստում, գաղտնի ընթացակարգով, ենթադրաբար սեպտեմբերի 5-ին, քանի որ միայն այդ նիստին է ՊԵԿ-ը գաղտնի որոշման նախագծեր ներկայացրել, որոնք անգամ անվանում չեն ունեցել։
Հիշեցնենք, որ ՊԵԿ-ը հրաժարվել էր տրամադրել ՀԴՄ-ների ձեռքբերման պայմանագրերը՝ հղում կատարելով «Պետական և ծառայողական գաղտնիքի մասին» ՀՀ օրենքին։ Պատճառաբանել էր, որ դրանք համարվում են այնպիսի տեղեկություններ, որոնց հրապարակումը կարող է ծանր հետևանքներ առաջացնել Հայաստանի անվտանգության համար:
ՀԴՄ-ների ձեռքբերման պայմանագրերի տրամադրման մերժումը ապրիլի 15-ին «Հետաքննող լրագրողներ» ՀԿ-ն բողոքարկել էր դատական կարգով` հայցադիմում էր ներկայացրել Վարչական դատարան՝ ընդդեմ Պետական եկամուտների կոմիտեի։ Օգոստոսի 6-ին Վարչական դատարանը որոշեց ՊԵԿ-ին պարտավորեցնել տրամադրել չինական «Պաքս Թեքնոլոջի» և թայվանական «Միտաք Ինֆորմեյշն Թեքնոլոջի» ընկերությունների հետ կնքված բոլոր պայմանագրերի պատճենները՝ փակելով այն տեղեկությունները, որոնք, ըստ Կառավարության որոշման, համարվում են գաղտնի։
Այնինչ օրեր առաջ ՊԵԿ-ը վերաքննիչ բողոք է ներկայացրել Վարչական դատարանի՝ օգոստոսի 6-ին հօգուտ «Հետաքննող լրագրողներ»-ի կայացրած վճռի դեմ։ Կոմիտեն մասնավորապես բողոքարկման հայցադիմում հայտնել է, որ դատարանը բազմակողմանի, լրիվ և օբյեկտիվ չի վերլուծել այս գործի քննության ընթացքում ձեռք բերված ապացույցները։
Պետական եկամուտների կոմիտեի իրավաբանական վարչության պետի ժամանակավոր պաշտոնակատար Նաիրա Ավանեսյանը, ում կողմից երեկ «Հետքը» ստացել է այս գրությունը, հայտնել է, որ վերաքննիչ բողոքի պատճառը Վարչական դատարանի որոշ մեկնաբանությունների անհամաձայնությամբ է պայմանավորված։
Ընթերցեք նաև՝
- ՀԴՄ-ները կառավարության գաղտնի որոշումով ձեռք են բերվել բարձր արժեքով․ հարուցվել է քրեական գործ
- Նոր ՀԴՄ-ները վաճառվել են ինքնարժեքից մոտ 70% թանկ գնով. ՊԵԿ-ը գաղտնի է պահում պայմանագրերը
- ՀԴՄ-ների գնման պայմանագրերի հրապարակումը «կարող է ծանր հետևանքներ առաջացնել»
- Ինչպես է ՊԵԿ-ը հովանավորում նախկին բարձրաստիճան պաշտոնյաներին առնչվող բիզնեսը
- Դատարանը պարտավորեցրեց ՊԵԿ-ին «Հետաքննող լրագրողներ»-ին տրամադրել ՀԴՄ սարքերի ձեռքբերման պայմանագրերը
Մեկնաբանել