Ալեքսեյ Նավալնին դուրս է գրվել Բեռլինի «Charite» կլինիկայից
Բեռլինի «Charite» կլինիկան սեպտեմբերի 23-ի առավոտյան հայտարարել է, որ ռուս ընդդիմադիր գործիչ Ալեքսեյ Նավալնին դուրս է գրվել։ Ընդհանուր առմամբ, նա հիվանդանոցում մնացել է 32 օր։ Այդ մասին գրում է «BBC»-ն։
Կլինիկայի կայքում հրապարակված մամլո հաղորդագրության մեջ նշվում է, որ Նավալնիի առողջական վիճակը այնքան է լավացել, որ բժիշկները հնարավոր են համարել նրա դուրս գրումը ստացիոնար բուժումից։ Բացի այդ, հաղորդագրության մեջ նշվում է, որ բժիշկները հնարավոր են համարում Նավալնու ամբողջական ապաքինումը, սակայն չեն բացառում, որ թունավորման հետևանքները կարող են ի հայտ գալ դեռ հետագայում։ Հաղորդագրության մեջ նաև նշվում է, որ Նավալնին կլինիկայում անց է կացրել, ընդհանուր առմամբ, 32 օր, որից 24-ը՝ ինտենսիվ թերապիայի բաժանմունքում։
Նավալնին «Instagram»-ի իր էջում հրապարակել է գրառում, որտեղ պատմել է վերականգնման ընթացքի մասին։
Ալեքսեյ Նավալնու առողջական վիճակը վատացել էր օգոստոսի 20-ին Տոմսկ-Մոսկվա ինքնաթիռում։ Օդաչուները արտակարգ վայրէջք էին կատարել Օմսկում, որտեղ Նավալնին հոսպիտալացվել էր։ Նրա բարեկամները և աջակիցները նշել էին, որ, ամենայն հավանականությամբ, Նավալնին թունավորվել է, սակայն Օմսկի բժիշկները հայտարարել էին, որ քաղաքական գործչի մոտ չեն հայտնաբերվել թունավորման հետքեր։
Ընդ որում, Օմսկի բժիշկները պնդում էին, որ քաղաքական գործչին չի կարելի տեղափոխել։ Նավալնիի հարազատները պնդել էին նրան տեղափոխել Գերմանիա բուժման։ Արդյունքում, Օմսկի հիվանդանոցի բժիշկները թույլատրել էին տեղափոխումը, և օգոստոսի 22-ի առավոտյան նա հոսպիտալացվել էր Բեռլինի «Charite» կլինիկայում։
Բեռլինի կլինիկայի բժիշկներն ավելի ուշ հայտարարել էին, որ առկա են թունավորման հետքեր։ Սեպտեմբերի 2-ին Գերմանիայի իշխանությունները, հղում կատարելով Բունդեսվերի լաբորատորիայի մասնագետների եզրակացության վրա, հայտարարել էին, որ Նավալնին թունավորվել է «Նովիչոկ» խմբի թույնով։ Սեպտեմբերի 7-ին կլինիկական հայտնել էր, որ Նավալնու առողջական վիճակը բարելավվել է, նա դուրս է եկել արհեստական կոմայից և բժիշկներն անջատել են թոքերի արհեստական շնչառության ապարատը։
Մեկ շաբաթ անց էլ կլինիկան հայտնել է, որ քաղաքական գործիչը կարող է ինքնուրույն վերկենալ անկողնուց, իսկ Գերմանիայի իշխանությունները հայտարարել են, որ Նավալնու անալիզներում «Նովիչոկ»-ի հետքերի առկայությունը հաստատել են նաև երեք անկախ լաբորատորիաները։ Ավելի ուշ դա հաստատել են նաև Ֆրանսիան և Շվեդիան, որոնք իրականացրել են անալիզների սեփական հետազոտությունը։
Ռուսական կողմը պնդում է, որ Օմսկի հիվանդանոցում Նավալնուց վերցված անալիզներում չի հայտնաբերվել որևէ թույնի հետք և չկա որևէ հիմք քրեական գործ հարուցելու համար։ Ռուսական դատախազությունը երկու հարցում է ուղարկել գերմանական կողմին՝ խնդրելով տրամադրել փորձանմուշների ուսումնասիրության արդյունքները։ Գերմանական իշխանությունները հայտարարել են, որ դիմումը կարող է բավարարվել միայն Նավալնիի համաձայնության դեպքում։
Նավալնիի աջակիցները կարծում են, որ քաղաքական գործչին «Նովիչոկ»-ով կարող էին թունավորել մինչև Տոմսկի օդանավակայան ժամանելը։ Այդ մասին վկայում են թույնի հետքերը, որոնք, ըստ Կոռուպցիայի դեմ պայքարի հիմնադրամի տվյալների, հայտնաբերվել են Նավալնու հյուրանոցի համարի ջրի շշի վրա։ Թունավորման լուրից հետո նրա աջակիցները հավաքել էին այդ շշերը և ուղարկել Գերմանիա։
Եվրախորհրդարանը պահանջում է սկսել Նավալնու թունավորման հետաքննությունը։ Սեպտեմբերի 17-ին Եվրախորհրդարանն ընդունել է բանաձև, որտեղ ռուսական իշխանություններին կոչ է արել համագործակցել Քիմիական զենքի արգելման կազմակերպության հետ՝ նրան տրամադրելով «Նովիչոկ» ծրագրի մասին ամբողջական տեղեկատվությունը։
Լուսանկարը՝ REUTERS / Courtesy of Instagram @NAVALNY/Social Media
Մեկնաբանել