
2024-ին «Զվարթնոցը» չի կարողացել հասնել 2023-ի ռեկորդային ուղեւորահոսքին
Հայաստանի գլխավոր օդային դարպասը՝ Երեւանի «Զվարթնոց» միջազգային օդանավակայանը, 2024 թվականին չի կարողացել հասնել 2023-ին գրանցված ռեկորդային ուղեւորահոսքին: Այդուհանդերձ, նախորդ տարի օդանավակայանը շատ հետ չի մնացել 2023-ի ցուցանիշներից:
Այսպես՝ եթե 2023-ին «Զվարթնոցից» օգտվել է 5.330.308 ուղեւոր, ապա 2024-ին եղել է 5.248.348: Նվազումը կազմել է 1,5 %, ինչն, իհարկե, փոքր տարբերություն է:
Այս մասին տեղեկանում են ՀՀ քաղավիացիայի կոմիտեից, որն իր հերթին տվյալները վերցրել է «Զվարթնոցի» կոնցեսիոն կառավարիչ ««Արմենիա» միջազգային օդանավակայաններ» ՓԲԸ-ից:
Նկատենք, որ 2023-2024 թթ. ուղեւորահոսքի ցուցանիշները կտրուկ տարբերվում են նախորդած տարիների թվերից, ինչը կարելի է տեսնել ստորեւ ներկայացվող ինֆոգրաֆիկայում:
Եթե 2023-ին ժամանած ուղեւորները մեկնածներից ավելի շատ էին (ժամանածները՝ 50,2 %, մեկնածները՝ 49,8 %), ապա նախորդ տարի հակառակ պատկերն էր (ժամանածները՝ 49,9 %, մեկնածները՝ 50,1 %): 2024-ին «Զվարթնոցով» ժամանել է 2.618.836 մարդ, մեկնել՝ 2.629.512 հոգի:
Ինչ վերաբերում է ամսական բացվածքին, ապա 2024-ին եւս պահպանվել է «Զվարթնոցի» ավանդական կորը: Այն է՝ ամենապասիվ ամիսը փետրվարն է, որից հետո արձանագրվում է աստիճանական աճ, որն էլ իր առավելագույնին է հասնում օգոստոսին (ամռան ամիսները զբոսաշրջային սեզոն են), ապա նորից նկատվում է անկում, սակայն դեկտեմբերին որոշակի աշխուժացում է լինում (Ամանորին Հայաստան վերադարձող կամ այստեղից մեկնող աշխատանքային միգրանտների, ինչպես նաեւ ժամանակող ու մեկնող զբոսաշրջիկների հաշվին):
Ընդ որում՝ չնայած 2024-ին ուղեւորահոսքը 2023-ից տարեկան կտրվածքով մի փոքր պակաս է եղել, նախորդ տարվա հունվար, մարտ, նոյեմբեր եւ դեկտեմբեր ամիսներին ավելի շատ ուղեւորներ են օգտվել «Զվարթնոցից», քան 2023-ի նույն ամիսների ընթացքում: Մանրամասները կարելի է տեսնել ինֆոգրաֆիկայում:
Բեռնափոխադրման սեգմենտում 2024 թվականը բավական հաջող է եղել «Զվարթնոցի» համար: Օդանավակայանը նոր նշաձող է սահմանել: Մասնավորապես՝ եթե 2022-ին ՀՀ գլխավոր օդային դարպասով տեղափոխվել էր 23.340 տոննա բեռ եւ փոստ, ապա 2023-ին այդ թիվը դարձել էր 33.850 տոննա, իսկ ահա 2024-ին «Զվարթնոցում» բեռնափոխադրման ծավալները հասել են 42.235 տոննայի:
Ինչպես կարելի է տեսնել ինֆոգրաֆիկայում, օգոստոսից սկսած բեռների ծավալները «Զվարթնոցում» կտրուկ աճել են եւ դեկտեմբերին անցել ամսական 5000 տոննայի շեմը:
Քաղավիացիայում, ուղեւորահոսքից ու բեռնափոխադրումից զատ, կարեւոր ցուցանիշ են թռիչք-վայրէջքների թվերը:
Սրանց քանակն ու օդանավերի տարողությունն են ապահովում ուղեւորափոխադրման ծավալների մեծ ցուցանիշները: Այսինքն՝ որքան շատ են չվերթերը եւ տարողունակ են օդանավերը, այնքան շատ են ուղեւորները:
Եթե 2023-ին գրանցվել էր 43.485 թռիչք եւ վայրէջք, ապա անցյալ տարի եղել է 39.168 թռիչք եւ վայրէջք, որոնցից 19.581-ը՝ թռիչք, 19.587-ը՝ վայրէջք: Ամսական բացվածքը՝ ստորեւ:
Հաջորդ հոդվածում կանդրադառնանք Գյումրու «Շիրակ» օդանավակայանի ցուցանիշներին:
Տես նաեւ՝
- «Զվարթնոցը» ուղեւորափոխադրման նոր ռեկորդ է սահմանել 2023-ին
- «Զվարթնոց» օդանավակայանը 2022-ին ռեկորդներ է գրանցել
- «Զվարթնոցի» ցուցանիշները «վերակենդանացում» են հուշում, բայց մտահոգիչը մեկնածների զգալի մեծ թիվն է
- Կորոնավիրուսի ու պատերազմի տարում «Զվարթնոց» օդանավակայանը հակառեկորդներ է գրանցել
- 2019-ին «Զվարթնոց» օդանավակայանի արտադրական ցուցանիշներն աճել են
- «Զվարթնոցի» ցուցանիշներն աճել են՝ բացի բեռնափոխադրումից
- «Զվարթնոցը» թարմացրել է նախորդ տարվա ռեկորդը (ինֆոգրաֆիկա)
- «Զվարթնոցում» կտրուկ աճել է տեղափոխվող ուղեւորների ու բեռի քանակը (ինֆոգրաֆիկա)
Լուսանկարը՝ «Զվարթնոցի» ֆեյսբուքյան էջից
Մեկնաբանել