«Ռոսսելխոզնադզորը» հունիսի 3-ից ժամանակավոր սահմանափակումներ է մտցնում հայկական ծագման մշակաբույսերի, կարտոֆիլի, չորացրած մրգերի և կորիզավոր պտուղների ներմուծման վրա։

Ինչպես նշված է կառույցի հայտարարության մեջ, սահմանափակվում է նաև այդ ապրանքների տարանցումը դեպի ԵԱՏՄ անդամ պետություններ՝ այդ երկրների կողմից կարանտինային ապրանքների ստացումը հաստատելու մեխանիզմների բացակայության պատճառով։

«Ռոսսելխոզնադզորն» այս անգամ ուղղակի գնահատական է տալիս Հայաստանի էկոնոմիկայի նախարարությանը։

«Սահմանափակումները սահմանվել են մինչև առաքվող ապրանքների անվտանգությունն ապահովելու համապատասխան ալգորիթմի մշակումը։ Սա ևս մեկ անգամ հաստատում է, որ Հայաստանի էկոնոմիկայի նախարարությունը կառուցվածքային խնդիրներ ունի և չի կարողանում լիարժեք իրականացնել գյուղատնտեսական արտադրողների նկատմամբ վերահսկողություն սահմանելու իր լիազորությունները»,- նշված է հայտարարության մեջ։

Նույն հայտարարության մեջ հիշեցվում է, որ 2019 թվականին կառավարության կողմից իրականացված կառուցվածքային բարեփոխումների արդյունքում Հայաստանի գյուղատնտեսության նախարարությունը լուծարվեց, և դրա գործառույթները փոխանցվեցին էկոնոմիկայի նախարարությանը: Ներկայումս հենց այդ գերատեսչությունն է պատասխանատու գյուղատնտեսության ոլորտի պետական քաղաքականության համար:

2026 թվականի մայիսի վերջին Ռուսաստանը մի շարք սահմանափակումներ սահմանեց Հայաստանից կատարվող ներմուծման նկատմամբ։ «Ռոսսելխոզնադզորը» սկսեց սահմանափակել հայկական բանջարեղենի (լոլիկ, վարունգ, պղպեղ և այլն), մրգերի (ելակ), ինչպես նաև ձկան և ձկնամթերքի ներմուծումը։

Նախկինում սահմանափակումներ էին մտցվել նաև կոնյակի, գինու, ծաղիկների և «Ջերմուկ» հանքային ջրի ներկրման վրա։

Տես նաև՝

• Ինչու են հայկական ապրանքները Ռուսաստանում դառնում «վտանգավոր»
• Ռուսաստանի կշիռը մեծանում է, ԵՄ-ինը՝ նվազում. Հայաստանի արտահանման շուկաները
• «Վտանգավոր» գինին ու կոնյակը, գազի գնի մասին ակնարկները. նոր հայտարարություններ ՌԴ-ից
• Ռուսաստան մատակարարվող հայկական բանջարեղենի ու մրգի մասով ևս խնդիրներ են արձանագրվում
• Ռուսաստանում կասեցվել է ևս 64.5 մլն շիշ «Ջերմուկ»-ի վաճառքը