Ռուսաստանը վաղվանից՝ 2026 թվականի հունիսի 12-ից, սահմանափակում է հայկական ծագման և Հայաստանից արտահանվող՝ կարանտինային վերահսկողության ենթակա ամբողջ արտադրանքի ներմուծումը, ինչպես նաև այդ արտադրանքի տարանցումը Ռուսաստանի տարածքով դեպի ԵԱՏՄ անդամ պետություններ։ 

Այս մասին իր պաշտոնական կայքում հայտարարել է «Ռոսսելխոզնադզոր»-ը (ՌԴ անասնաբուժական և բուսասանիտարական վերահսկողության դաշնային ծառայություն)։

Նշենք, որ կարանտինային վերահսկողության ենթակա են բուսասանիտարական (ֆիտոսանիտարական) ապրանքները՝ մրգերը, բանջարեղենը, ծաղիկները, սերմերը, չրերը և բուսական ծագման այլ արտադրանքը։

Որոշումն, ըստ կառույցի, ընդունվել է կարանտինային օբյեկտների պարբերաբար հայտնաբերման պատճառով, ինչպիսիք են վնասատուները, տարբեր հիվանդությունները։

«Ծառայությունը, սկսած ընթացիկ տարվա մայիսից, փուլ առ փուլ սահմանափակել է հայկական ծագման առանձին տեսակի՝ կարանտինային վերահսկողության ենթակա արտադրանքի ներմուծումը, ինչպես նաև բազմիցս տեղեկացրել է հայկական կողմին մատակարարումների ընթացքում արձանագրված խախտումների մասին»,- նշված է «Ռոսսելխոզնադզոր»-ի հայտարարության մեջ՝ հավելելով, որ կարանտինային օբյեկտների հայտնաբերման դեպքերը շարունակվում են։ Հունիսին արձանագրվել է կապրովյան բզեզով վարակվածության 3 դեպք՝ Հայաստանից ներմուծված ընկույզի, չորացրած դեղձի և չորացրած լոլիկի խմբաքանակներում։

«Ռոսսելխոզնադզոր»-ը կրկին ուղիղ տեքստով հայտարարում է, որ Հայաստանի լիազոր մարմնի կողմից իրականացվող վերահսկողությունը «բավարար չէ և անվստահություն է առաջացնում ֆիտոսանիտարական հավաստագրման համակարգի նկատմամբ»։ Դա, ըստ կառույցի, վտանգում է Ռուսաստանի և ԵԱՏՄ-ի ֆիտոսանիտարական բարեկեցությունը (անվտանգությունը)։

Առաջին անգամ չէ, որ ռուսական կողմն ուղիղ կերպով հայկական կողմին մեղադրում է ոչ պատշաճ վերահսկողության համար։

Օրինակ՝ այս տարվա մայիսի երկրորդ կեսին, երբ Ռուսաստանը սահմանափակեց Հայաստանից ծաղիկների ներմուծումը, «Ռոսսելխոզնադզոր»-ը հայտարարեց, որ չնայած Հայաստանի Սննդամթերքի անվտանգության տեսչական մարմնի ներկայացրած երաշխիքներին՝ ԵԱՏՄ-ի համար կարանտինային օբյեկտների հայտնաբերումը շարունակվում է։

Ռուս մասնագետները եկան Հայաստան ստուգումներ իրականացնելու։

• Ինչու են հայկական ապրանքները Ռուսաստանում դառնում «վտանգավոր»
• Ռուսաստան մատակարարվող հայկական բանջարեղենի ու մրգի մասով ևս խնդիրներ են արձանագրվում
• Ռուսաստանում կասեցվել է ևս 64.5 մլն շիշ «Ջերմուկ»-ի վաճառքը

2026 թվականի մայիսի վերջին Ռուսաստանը մի շարք սահմանափակումներ մտցրեց Հայաստանից կատարվող ներմուծման նկատմամբ։ «Ռոսսելխոզնադզորը» սկսեց սահմանափակել հայկական բանջարեղենի (լոլիկ, վարունգ, պղպեղ և այլն), մրգերի (մասնավորապես՝ ելակի), ինչպես նաև ձկան և ձկնամթերքի ներմուծումը։

Նախկինում սահմանափակումներ էին կիրառվել նաև հայկական կոնյակի, գինու, ծաղիկների և «Ջերմուկ» հանքային ջրի ներկրման վրա։

• «Վտանգավոր» գինին ու կոնյակը, գազի գնի մասին ակնարկները. նոր հայտարարություններ ՌԴ-ից
• Ռուսաստանը սահմանափակում է Հայաստանից կորիզավոր պտուղների, սմբուկի, կարտոֆիլի և չրերի ներմուծումը
• Ռուսաստանի կշիռը մեծանում է, ԵՄ-ինը՝ նվազում. Հայաստանի արտահանման շուկաները

Այս սահմանափակումների համատեքստում հայկական կողմը քննարկում է հայկական արտադրանքը Եվրոպա արտահանելու հնարավորությունները։ 

Հայաստանը 2015 թվականի հունվարից պաշտոնապես միացել է Եվրասիական տնտեսական միությանը։ Վերջին տարիներին ակտիվորեն քննարկվում է Եվրամիությանը ՀՀ անդամակցության հարցը, սակայն ռուս պաշտոնյաները պարբերաբար նշում են, որ Երևանը չի կարող միաժամանակ գտնվել երկու միություններում։

• Հայկական արտադրանքը՝ դեպի Եվրոպա․ ԵՄ-ն նոր հնարավորություններ է խոստանում