
2023-ի համեմատ 2024-ին «Շիրակում» ուղեւորահոսքն աճել է 10,3 %-ով
Հայաստանի երկրորդ միջազգային օդանավակայանը՝ Գյումրու «Շիրակը», 2024 թ. սպասարկել է 104.532 ուղեւորի, ինչը 10,3 %-ով ավելի է 2023-ի ցուցանիշից: 2023-ին «Շիրակից» օգտվել էր 94.768 ուղեւոր: Այս մասին «Հետքը» տեղեկացել է ՀՀ քաղավիացիայի կոմիտեից, որն իր հերթին տվյալները վերցրել է «Զվարթնոց» եւ «Շիրակ» օդանավակայանների կոնցեսիոն կառավարիչ ««Արմենիա» միջազգային օդանավակայաններ» ՓԲԸ-ից:
Եթե նախորդ տարի Երեւանի «Զվարթնոցը» փոքր հետընթաց է գրանցել եւ չի կարողացել կրկնել կամ գերազանցել 2023-ի ռեկորդային ուղեւորահոսքը, ապա «Շիրակը», ինչպես տեսնում ենք, առաջընթաց է ունեցել, սակայն դա հեռու է բավարար համարվելուց: Բանն այն է, որ 2014-2024 թթ. ընթացքում Գյումրու օդային դարպասը շատ ավելի բարձր արդյունքներ է ունեցել: Ստորեւ ներկայացված ինֆոգրաֆիկայում կարելի է տեսնել, որ 2017-2019 եւ 2021 թթ. «Շիրակի» ուղեւորահոսքն ավելի մեծ է եղել: Դեռեւս անգերազանցելի է մնում 2018-ի արդյունքը՝ 165.946 ուղեւոր:
Եթե 2023-ին «Շիրակում» ավելի շատ էին ժամանած ուղեւորները (50,2 %՝ մեկնածների 49,8 %-ի դիմաց), ապա 2024-ին ավելի շատ են եղել մեկնածները (50,1 %՝ ժամանածների 49,9 %-ի դիմաց): Հետաքրքիր է, որ 2023-2024 թթ. տոկոսային հենց այսպիսի համամասնություններ են գրանցվել նաեւ «Զվարթնոցում»:
2024-ին «Շիրակով» Հայաստան է ժամանել 52.133 մարդ, մեկնել՝ 52.399 հոգի:
Ի տարբերություն Երեւանի օդանավակայանի՝ «Շիրակում» ամսական ուղեւորահոսքն ավանդական ձեւավորված կոր չունի: Այսինքն՝ չկան ամիսներ, որոնք մշտապես պասիվ կամ ակտիվ կարող են համարվել:
Ինչ վերաբերում է բեռանփոխադրմանը (բեռ + փոստ), ապա 2024-ին «Շիրակով» բեռ չի տեղափոխվել:
Եթե 2023-ին «Շիրակը» ճանապարհել եւ ընդունել էր ընդհանուր 588 թռիչք ու վայրէջք, ապա 2024-ին այդ թիվը եղել է 694, որից 348-ը՝ թռիչք, 346-ը՝ վայրէջք: Ամսական բացվածքը՝ ստորեւ:
Տես նաեւ՝
- «Շիրակ» օդանավակայանի ուղեւորահոսքն աճել է 95 %-ով, բայց 100 հազարի էլ չի հասել
- Գյումրու «Շիրակ» օդանավակայանը կրկին ստվերում է մնացել
- «Շիրակով» մեկնածները եկածներից ավելի շատ են եղել այնքան, որքան Սիսիանի բնակչությունն է
- 2020-ին «Շիրակ» օդանավակայանի ուղեւորների թիվը կրճատվել է 4 անգամ
- Գյումրու «Շիրակ» օդանավակայանը հետընթաց է գրանցել նախորդ տարի
- «Շիրակ» օդանավակայանի ցուցանիշներն աճում են, բայց հեռու են բավարար լինելուց
- «Շիրակ» օդանավակայանը վերակենդանացել է. հուշում են թվերը
- «Շիրակում» արձանագրվել են վերջին տարիների վատագույն ցուցանիշները (ինֆոգրաֆիկա)
Լուսանկարում՝ «Շիրակ» օդանավակայանի մեկնման նոր սրահը (primeminister.am)
Մեկնաբանել