Քիչ առաջ՝ Երեւանի ժամանակով 19:24-ին, «Զվարթնոց» օդանավակայանում վայրէջք է կատարել վերջին շաբաթների ավիացիոն նորությունների գլխավոր հերոսը՝ «Fly Armenia Airways» ավիաընկերության «Boeing 737-300» ինքնաթիռը (հայկական գրանցումը՝ EK-FAA):

Մոտ մեկ ժամ առաջ ՀՀ քաղավիացիայի կոմիտեն հայտնել էր, որ նախատեսվում է օդանավի ժամանումը 19:15-ին: Ինքնաթիռը Թեհրանի «Մեհրաբադ» օդանավակայանից օդ է բարձրացել Երեւանի ժամանակով 17:58-ին եւ մեկուկես ժամից իջել «Զվարթնոցում»: 

Հիշեցնենք, որ «Fly Armenia Airways» ավիաընկերության կողմից շահագործվող «Boeing 737-300» ինքնաթիռը փետրվարի 19-ին տեխսպասարկման նպատակով Տալլին-Գոստոմել թռիչքի փոխարեն Էստոնիայի մայրաքաղաքից թռել էր բուլղարական Վառնա, իսկ ամսի 20-ին այնտեղից թռել ու վայրէջք կատարել Թեհրանում, որտեղ մնացել էր մինչեւ այսօր: Տալլին-Գոստոմելից բացի՝ այլ ուղղությամբ թռիչք կատարելու իրավունք ինքնաթիռը չուներ: Կատարվածից հետո՝ փետրվարի 25-ին, ԱԱԾ-ն քրեական գործ է հարուցել օդանավ փախցնելու եւ փաստաթուղթ կեղծելու հոդվածներով:

Իր հերթին ՔԱԿ-ը «Հետքին» հայտնել էր, որ կոմիտեում ընթանում է «Boeing 737-300» օդանավի միջադեպի հետ կապված ուսումնասիրություն՝ հանգամանքները պարզելու նպատակով, որի ավարտից հետո կոմիտեն հանդես է գալու համապարփակ պարզաբանմամբ: Թե երբ կավարտվի ուսումնասիրությունը, հայտնի չէ:

Տես նաեւ՝

• ՔԱԿ. Իրանում հայտնված օդանավի վրա տեխնիկական բազմաթիվ խնդիրներ են հայտնաբերվել. մեծ մասը վերացվել է
• Հայկական օդանավը փախցրե՞լ են. ԱԱԾ-ն այս հատկանիշներով է քննում գործը
• Իրանում հայտնված օդանավը շահագործող հայկական ընկերությունը կարող է հայտնվել ամերիկյան «սեւ ցուցակում»
• Հայկական օդանավն Իրան տեղափոխելու առաջին ռաունդը կարծես ավարտված է, բայց դա վերջը չէ
• Հայկական ինքնաթիռի արկածներն ու անպատասխան հարցերը
• Իրանում հայտնված ինքնաթիռը շահագործող հայկական ընկերությունից հեռացել է դրա սկանդալային նախկին սեփականատերը
• «Կորած» հայկական ինքնաթիռի հետքերով. «Հետքը» պարզել է նրա թռիչքի հետագիծը
• Ինչու է կասեցվել հայկական նոր ավիափոխադրողի վկայականի գործողությունը
• Հայկական նոր ավիափոխադրողի արտասահմանցի ներդրողը հայտնի է սկանդալներով
• «Ֆլայ Արմենիա Էյրվեյզը» դեռ չի կարող երկինք բարձրանալ
• Ովքե՞ր են հայկական շուկա մտնող նոր ավիաընկերության տերերը