Հայաստանի, Ռուսաստանի և Ադրբեջանի փոխվարչապետներն առաջիկա օրերին կշարունակեն աշխատանքը
Հայաստանի, Ռուսաստանի և Ադրբեջանի փոխվարչապետներ Մհեր Գրիգորյանի, Ալեքսեյ Օվերչուկի և Շահին Մուստաֆաևի գլխավորած եռակողմ աշխատանքային խումբը, որն զբաղվում է Հարավային Կովկասում տնտեսական և տրանսպորտային կապերի ապաշրջափակմամբ, իր աշխատանքները կշարունակի առաջիկա օրերին։ Այդ մասին ռուսական ТАСС գործակալությանը հայտնել են ՀՀ փոխվարչապետի գրասենյակից։
«Հայաստանի, Ռուսաստանի և Ադրբեջանի փոխվարչապետների գլխավորած եռակողմ աշխատանքային խմբի նիստը կշարունակվի առաջիկա օրերին։ Արդյունքների մասին հնարավոր կլինի խոսել միայն նիստի ավարտից հետո»,- նշել են Մհեր Գրիգորյանի գրասենյակից։
Հիշեցնենք, որ նախօրեին Մոսկվայում անցկացվել էր եռակողմ աշխատանքային խմբի հերթական նիստը։ Այն կայացել էր նոյեմբերի 26-ին Սոչիում երեք երկրների ղեկավարների հանդիպումից հետո։ Վերջին անգամ ղեկավարները հանդիպել էին 2021 թվականի հունվարի 11-ին, որի արդյունքում ստորագրվել էր հայտարարություն՝ փոխվարչապետների մակարդակով եռակողմ աշխատանքային խմբի ստեղծման վերաբերյալ։ Այն պետք է զբաղվեր տարածաշրջանում տնտեսական և հաղորդակցային կապերի ապաշրջափակմամբ։
Ռուսաստանի նախագահը նոյեմբերի 26-ի հանդիպումն անվանել էր օգտակար և ճիշտ ժամանակին, ինչպես նաև հույս հայտնել, որ կողմերը կհետևեն պայմանավորվածությունների պահպանմանը։
Մեկնաբանել