Ադրբեջանի պաշտպանության նախարարությունն այսօր հաղորդագրություն է տարածել այն մասին, թե իբր Պաշտպանության բանակի զինծառայողները կրակ են բացել Թերթերի շրջանի Ղափանլը գյուղի ուղղությամբ: Արցախի պաշտպանության նախարարությունը ադրբեջանական կողմի հաղորդագրությունը հերքող հայտարարությամբ է հանդես եկել, որը ներկայացնում ենք ստորև.

«Ադրբեջանի պաշտոնական քարոզչությունը, շարունակելով հավատարիմ մնալ ստի և կեղծիքի վրա հիմնված իր քաղաքականությանը, այսօր հաղորդագրություն է տարածել, թե իբր ՊԲ զինծառայողները գնդացիրներից և դիպուկահար հրացաններից կրակ են բացել Թերթերի շրջանի Ղափանլը գյուղի ուղղությամբ:

ԱՀ պաշտպանության նախարարությունը հայտարարում է, որ վերոնշված հաղորդագրությունն ադրբեջանական կողմի հերթական ապատեղեկատվությունն է: Ավելին՝ պաշտպանության բանակի համար քաղաքացիական բնակչությունն ու օբյեկտները երբևէ թիրախ չեն հադիսացել ու չեն հանդիսանում:

ՊԲ առաջապահ ստորաբաժանումները շարունակում են հետևել հրադադարի պահպանման ռեժիմին և անհրաժեշտության դեպքում պատրաստ են ձեռնարկել իրադրությունից բխող անհրաժեշտ գործողություններ»: