Արարատ Միրզոյանը՝ Հունան Պողոսյանի նշանակման մասին. «Երկրորդ շանս պետք է ունենան բոլորը»
Նոր Հայաստանում երկրորդ շանս պետք է ունենան բոլորը:
Այս մասին խորհրդարանում լրագրողների հետ զրույցում ասաց առաջին փոխվարչապետ Արարատ Միրզոյանը՝ անդրադառնալով կառավարության որոշմանը՝ նախկին փոխոստիկանապետ Հունան Պողոսյանին Սյունիքի մարզպետ նշանակելուն, ինչից հետո հանրային դժգոհություն առաջացավ:
«Նոր Հայաստանում պիտի հնարավորություն ունենան բոլորը, անշուշտ խոսքը չի գնում նրանց մասին, ովքեր մարդ են սպանել, բայց մեծ հաշվով` երկրորդ շանս պետք է ունենան բոլորը»,- ասաց Միրզոյանը:
Առաջին փոխվարչապետի վստահեցմամբ՝ իրենք պատրաստ են աշխատել բոլորի հետ, ովքեր կընդունեն խաղի կանոնները:
«Մեր ձեռքը մեկնած է, օդում է, և բոլոր նրանք, ովքեր ուզում են նոր խաղի կանոններով աշխատել, նրանք պիտի այդ հնարավորությունն ունենան. տվյալ դեպքում կառավարությունը, վարչապետը նպատակահարմար են գտել աշխատել Հունան Պողոսյանի հետ: Չենք կարող չէ ընտրել, օրինակ, 10 հազար մարդու՝ նախկին պաշտոնյաների, բիզնեսմենների թիկնապահներին, ընտանիքներին և վտարել Հայաստանից, սա ճիշտ չէ, չէ՞»,- ասաց Միրզոյանը:
Դիտարկմանը, որ միգուցե կառավարությունը կադրային քաղց ունի, և դա է պատճառը, որ նախկին պաշտոնյաներն են պաշտոն ստանձնում, Միրզոյանը չհամաձայնեց՝ վստահեցնելով, որ կադրային քաղց չկա.
«Կա փորձ՝ լինել ավելի ներառական»,- ասաց նա:
Մեկնաբանել