Հակառակորդի դիվերսիան հետ մղած զինծառայողը կբուժվի Ֆրանսիայում
Զինվորական ծառայության պարտականությունները կատարելիս հրազենային վնասվածք ստացած Ռուզվելտ Արայի Թորոսյանի բուժումը Ֆրանսիայի Հանրապետությունում իրականացնելու նպատակով 2018 թվականի պետական բյուջեի պահուստային ֆոնդից կհատկացվի 1 միլիոն 303 հազար դրամ: Չզեկուցվող որոշումն ընդունվեց կառավարության այսօրվա նիստին:
Արձանագրության մեջ նշվում է, որ հիմք է հանդիսացել «Զինվորական ծառայության և զինծառայողի կարգավիճակի մասին» օրենքի 64-րդ հոդվածի 3-րդ մասի և Հայաստանի Հանրապետության կառավարության 2016 թվականի ապրիլի 21-ի N 410-Ն որոշմամբ հաստատված կարգի պահանջները:
ՀՀ կառավարության պահուստային ֆոնդից պաշտպանության նախարարությանն է հատկացվում 1 միլիոն 303 հազար դրամ, որը նախարարության կողմից պետք է փոխանցվի Ռ. Թորոսյանի բանկային հաշվեհամարին` Ֆրանսիայի Հանրապետությունում վերջինիս բուժումն ապահովելու համար: Թորոսյանը հրազենային վնասվածք է ստացել 2014 թվականի մայիսի 27-ի լույս 28-ի գիշերը՝ հայ-ադրբեջանական հակամարտ զորքերի շփման գծի հարավային ուղղությամբ հակառակորդի ձեռնարկած հետախուզադիվերսիոն գործողությունները հետ մղելիս:
Մեկնաբանել