Տեսանյութեր
Լուսանկարներ
Նիկոլ Փաշինյան. «Ինչ ընտրական օրենսգրքով էլ անցնեն արտահերթ խորհրդարանական ընտրությունները, ժողովրդի հաղթանակն անխուսափելի է»
Վարչապետի պաշտոնակատար Նիկոլ Փաշինյանը ֆեյսբուքյան ուղիղ եթերով անդրադարձել է Ընտրական օրենսգիրք սահմանադրական օրենքի նախագծի քվեարկության տապալմանը:
«Առաջարկվող փոփոխություններն ընտրական օրենսգիրքն առավել ժողովրդավարական դարձնելու նպատակ ունեին, և Ընտրական օրենսգիրքը առավել պարզ դարձնելու նպատակ ուներ: Իմ քաղաքական գնահատականը հետևյալն է՝ ԱԺ-ն ևս մեկ անգամ ի ցույց դրեց, որ խորհրդարանական արտահերթ ընտրություններն անխուսափելի են, որովհետև այսօրվա քվեարկությունը ցույց է տալիս իրերի իրական դրությունը, երբ խորհրդարանական մեծամասնությունը և նրա կողմնակիցներն ամեն ինչ անում են սաբոտաժի քաղաքականություն իրականացնելու համար»,- ասաց Փաշինյանը:
Հիշեցնենք, որ նախագիծը չընդունվեց 56 կողմ, 3 դեմ ձայների հարաբերակցությամբ:
Նիկոլ Փաշինյանի համոզմամբ՝ այս քայլերով խորհրդարանական մեծամասնությունը փորձում է արտահերթ ընտրությունները վերածել ռևանշի գործիքի:
«Ես ուզում եմ ասել հետևյալը, եթե անգամ արտահերթ խորհրդարանական ընտրությունները տեղի ունենան գործող ընտրական օրենսգրքով, դա միևնույն է որևէ բան չի փոխում, որովհետև ժողովրդի հաղթանակն անխուսափելի է, վերադարձ անցյալին չկա ու չի լինելու, այնպես որ ՀՀ քաղաքացիներին կոչ եմ անում իրապես պատրաստվել արտահերթ խորհրդարանական ընտրություններին: Կոչ եմ անում իշխանափոխությունը հասցնել իր վերջնական հանգրվանին, ինչ ընտրական օրենսգրքով էլ անցնեն արտահերթ խորհրդարանական ընտրությունները, ժողովրդի հաղթանակը անխուսափելի է, և վերադարձ անցյալին չի լինելու. սկզբունքորեն շարունակվելու է պայքարը ապօրինությունների ու կոռուպցիայի դեմ: Էնպես որ ժողովուրդ ջան, դուխով, հեղափոխությունը հասնելու է իր վերջնական հանգրվանին. դեկտեմբերին տեղի են ունենալու արտահերթ խորհրդանական ընտրություններ»,- ասաց Նիկոլ Փաշինյանը:
Մեկնաբանել