Վարչապետը ցավակցական հեռագիր է հղել Էմանուել Մակրոնին Մալիում ֆրանսիացի զինծառայողների մահվան կապակցությամբ
Վարչապետ Նիկոլ Փաշինյանը ցավակցական հեռագիր է հղել Ֆրանսիայի Հանրապետության նախագահ Էմանուել Մակրոնին Մալիում տեղի ունեցած դժբախտ պատահարի կապակցությամբ։ Այս մասին հաղորդում է կառավարության մամուլի ծառայությունը։
Ցավակցական հեռագրում մասնավորապես ասվում է հետևյալը․
«Խոր ցավով տեղեկացա Մալիում ուղղաթիռների բախման արդյունքում տասներեք ֆրանսիացի զինծառայողի մահվան մասին, որը ֆրանսիական բանակի համար ամենամեծ կորուստն է վերջին երեսուն տարվա ընթացքում։
Ֆրանսիայի համար սգո այս դժվարին պահին, խնդրում եմ ընդունել հայ ժողովրդի և անձամբ իմ խորին ցավակցությունները՝ Ձեզ և ֆրանսիացի բարեկամ ժողովրդին։ Կիսում ենք զոհվածների ընտանիքների և հարազատների խոր վիշտը և կսկիծը»։
Հիշեցնենք, որ նոյեմբերի 26-ին Մալիում երկու ուղղաթիռների բախման հետևանքով զոհվել էր ֆրանսիացի 13 զինծառայող։ Նրանք մասնակցում էին «Իսլամական պետության» հետ կապեր ունեցող ահաբեկչական խմբավորումների դեմ օպերացիային։
Մեկնաբանել