Հրազդանի նախկին քաղաքապետ Արամ Դանիելյանին փորձում են առերեսել մեկի հետ, սակայն Դանիելյանը հրաժարվում է առերեսումից: Այս մասին «Հետք»-ի հետ զրույցում ասաց Դանիելյանի պաշտպան Ալեքսանդր Սիրունյանը՝ նշելով, որ Դանիելյանն այս պահին առհասարակ հրաժարվում է որևէ քննչական գործողության մասնակցել, որևէ ցուցմունք չի տվել:

Պաշտպանի համար անհասկանալի է, թե ինչու է քննչական մարմինը ցանկանում առերես հարցաքննություն անցկացնել այն դեպքում, երբ Դանիելյանն առհասարակ հրաժարվել է ցուցմունք տալ:

Նշենք, որ Դանիելյանը ձերբակալվել է այսօր՝ ժամը 14:00-ի սահմաններում, որպես համայնքի ղեկավար պաշտոնավարման տարիներին՝ 2015-2018թթ. ընթացքում, համայնքապետարանի աշխատակազմի հողի հարկի և գույքահարկի գումարներից առանձնապես խոշոր չափերի յուրացումներ և վատնումներ կատարելու կասկածանքով:

Պաշտպան Ալեքսանդր Սիրունյանը մեզ հետ զրույցում նշեց, որ խոսքը միլիոնավոր դրամների մասին է, սակայն Դանիելյանը չի ընդունում կասկածանքը: «Ասում են, որ քաղաքապետարանից փող է կորել, մենք էլ ուզում ենք հասկանալ, թե ուր է կորել, մեզ էլ է հետաքրքիր»,- ասաց Սիրունյանը:

Թե ով է ցուցմունք տվել Դանիելյանի դեմ, պաշտպանն այս պահին չի ցանկանում հայտնել, ասաց միայն, որ Հրազդանի քաղաքապետարանի նախկին աշխատակից է: Պաշտանը նշեց, որ բողոքարկել են Դանիելյանի ձերբակալման որոշումը, առաջիկայում հայտնի կլինեն դատական նիստի օրն ու ժամը: