Հոկտեմբերի 17-ին` ժամը 11.00-ին, Երևանի Շահումյանի անվան հրապարակում հանդիսավորապես կհայտարարվի Չինաստանի կողմից Հայաստանին նվիրատվության միջոցով հանրապետությունը սպասարկող շտապօգնության մեքենաների ողջ պարկի վերազինման ծրագրի մեկնարկը: Այս մասին տեղեկացնում է առողջապահության նախարարությունը։

Ըստ հաղորդագրության՝ միջոցառմանը ներկա կգտնվեն վարչապետ Նիկոլ Փաշինյանը, ՀՀ-ում Չինաստանի արտակարգ եւ լիազոր դեսպանը, առողջապահության, արտաքին գործերի, տարածքային կառավարման եւ զարգացման նախարարները, Երեւանի քաղաքապետը և այլք:

Ավելի վաղ նախարարությունը տեղեկացրել էր, որ Երևանում և մարզերում կբաշխվեն շտապօգնության 200 մեքենաներ։ Հիշեցնենք, որ մեքենաները տրամադրվում են Հայաստանին Չինաստանից տրամադրված դրամաշնորհի ֆինանսական միջոցներով։