Ցմահ դատապարտյալներն այսուհետ կարող են պահվել մյուսների հետ
Կառավարության նիստում հավանություն տրվեց «Քրեակատարողական օրենսգրքում փոփոխություններ և լրացումներ կատարելու մասին», «Ձերբակալված և կալանավորված անձանց պահելու մասին» և հարակից ներկայացված օրենքների նախագծերին:
Փաթեթը ներկայացրեց արդարադատության ժամանակավոր փոխնախարար Արթուր Հովհաննիսյանը՝ ասելով, որ այն պատրաստվել է ՄԻՊ գրասենյակի հետ համատեղ:
«Մենք նախատեսում ենք, որ դատապարտյալին մեկ քրեակատարողական հիմնարկից մեկ այլ հիմնարկ տեղափոխելու համար կարող է հիմք դիտարկվել նաև մերձավոր ազգականների հետ շփումները, այսինքն՝ դատապարտյալներին ըստ ՔԿՀ-ների տեղաբաշխել, որ ազգականների բնակության վայրերին մոտ ՔԿՀ տեղակայվի, որ արտաքին աշխարհի հետ կապն ավելի արդյունավետ լինի»,- ասաց Հովհաննիսյանը:
Փոխնախարարի պաշտոնակատարի խոսքով՝ նախատեսում են նաև 1 երկարատև տեսակցություն՝ մինչև 3 օր տևողությամբ:
«Մենք գտնում ենք, որ անկախ նրանից, թե անձը ինչ հանցանք է գործել, եթե կան օրենքով նախատեսված հիմքեր անձին կարճատև մեկնում տալու համար, ապա մենք այդ անձին կտրամադրենք, իսկ անվտանգության ապահովումը կկազմակերպվի»,- ասաց նա:
Փոփոխություններից է նաև այն, որ դատապարտյալին կարճատև մեկնում կտրվի այն դեպքում նաև, երբ վերջինիս երեխան գտնվում է դժվար իրավիճակում:
Թույլատրվելու է նաև, որ դատապարտյալն իր հաշվին գնումներ անի այսուհետ ոչ թե մինչև 30 հազար դրամի, այլ մինչև 60 հազար դրամի սահմանում, «քանի որ գնաճ է տեղի ունեցել ու առավելագույն շեմը պահպանելը արդարացված չէ»:
«Ցմահ դատապարտյալներին այսուհետ պարտականություն չի լինելու առանձին պահել մյուս դատապարտյալներից, ընդհակառակը՝ ցմահ դատապատյալները պահվելու են մյուս դատապարտյալների հետ համատեղ»,- ասաց Արթուր Հովհաննիսյանը:
Այն դեպքերում, երբ ցմահ դատապարտյալը ցանկանում է առանձին պահվել, կարող է դիմում գրել:
Մեկնաբանել