Մարդու իրավունքների պաշտպանի ներկայացուցիչները մշտադիտարկման այց են իրականացրել ոստիկանության Երևան քաղաքի ուղեկցող գումարտակ և ուսումնասիրել են ազատությունից զրկված անձանց տեղափոխման համար նախատեսված տրանսպորտային միջոցների պայմանները: Այս մասին հայտնում է ՄԻՊ աշխատակազմը:

Հաղորդագրության համաձայն՝ ուշադրություն է դարձվել նշված տրանսպորտային միջոցների խցերին, դրանց մակերեսներին, սանիտարահիգիենիկ վիճակին ու կահավորմանը, օդափոխությանը, ջեռուցմանը, լուսավորությանը և անվտանգության պայմաններին:

Մշտադիտարկումը ցույց է տվել, որ մարդու իրավունքների պաշտպանի՝ որպես կանխարգելման ազգային մեխանիզմի 2017 թվականի գործունեության վերաբերյալ տարեկան զեկույցում արձանագրված խնդիրներից որոշները կարգավորվել են (օրինակ՝ սանիտարահիգիենիկ վիճակ): Դրա հետ միասին, դեռևս կան չլուծված խնդիրներ։ Խոսքը, մասնավորապես, վերաբերում է թափքի շարժման ընթացքում անձի անվտանգության ապահովմանը, տրանսպորտային միջոցների բնական լուսաթափանցելիությանը, դրանց մակերեսներին, ջեռուցմանը:

«Մարդու իրավունքների պաշտպանի իրավասության շրջանակում կձեռնարկվեն օրենքով նախատեսված անհրաժեշտ քայլեր արձանագրված խնդիրների լուծմանը նպաստելու կապակցությամբ»,- գրված է հաղորդագրության մեջ։