Կարո Կարապետյանի սպանության և Հարություն Ղարագյոզյանի ինքնասպանության գործերը կարճվել են
ԱԺ նախկին պատգամավոր, «Յուվեցի Կարո» անունով հայտնի Կարո Կարապետյանի սպանության գործը կարճվել է: Այս մասին «Հետքի» հետ զրույցում ասաց Քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը:
Ըստ քննության տվյալների՝ սպանությունը կատարելու մեջ կասկածվող անձի՝ «Կարամելի Հարութ» անունով հայտնի Հարություն Ղարագյոզյանի ինքնասպանության գործը ևս կարճվել է:
Հիշեցնենք, որ Կարո Կարապետյանը սպանվել է 2018 թվականի հոկտեմբերի 6-ին «Այգի» ռեստորանային համալիրում հնչած կրակոցների հետևանքով: Դրանից հետո Զովունիում հայտնաբերվել էր ԱԺ նախկին պատգամավոր Հարություն Ղարագյոզյանի դին: Քննությամբ պարզվել է, որ Ղարագյոզյանն ինքնասպան է եղել:
Նշենք, որ Կարո Կարապետյանի և Հարություն Ղարագյոզյանի միջև «Այգի» ռեստորանային համալիրում տեղի ունեցած միջադեպին ականատես անձ է եղել: Վերջինս հարցաքննվել է վկայի կարգավիճակով:
Գործի քննության սկզբնական փուլում, թեև քննության առարկա է դարձել այն վարկածը, որ ԱԺ նախկին պատգամավորների միջև գույքային վեճ է եղել՝ սպանության բուն շարժառիթն, ըստ Քննչական կոմիտեի, մնում է չպարզված:
Նաիրա Հարությունյանը մեզ հետ զրույցում ասաց, որ սպանության բուն շարժառիթը հնարավոր չի եղել պարզել, քանի որ վեճը տեղի է ունեցել Կարապետյանի և Ղարագյոզյանի միջև, որոնք մահացել են:
Մեկնաբանել