Խորհրդարանն արտահերթ նիստով քննարկեց Ընտրական օրենսգրքում լրացումներ ու փոփոխություններ կատարելու կառավարության ներկայացրած նախագիծը: Հիշեցնենք, որ այս փոփոխություններով առաջարկվում է հրաժարվել ռեյտինգային ընտրակարգից, ամբողջությամբ անցում կատարել համամասնական ընտրակարգի, ընտրվելու նվազագույն շեմի նվազեցում, կուսակցությունների դեպքում՝ 5 %-ից դարձնելով 4 %, իսկ կուսակցությունների դաշինքների պարագայում 7 %-ի փոխարեն 6 %, կանանց ներգրավվածության բարելավում՝ 25%-ի փոխարեն դարձնելով 30%:

Նախագիծը ներկայացրեց արդարադատության նախարարի պաշտոնակատար Արտակ Զեյնալյանը: Վերջինիս խոսքով՝ այժմ խորհրդարանում բացակայում է քաղաքական կայուն մեծամասնությունը, ինչը Սահմանադրության հիմնարար սկզբունքներից է:

«Սա սահմանադրական ճգնաժամ է, որը պետք է օր առաջ լուծվի»,- ասաց Արտակ Զեյնալյանը:

ՀՀԿ խմբակցության պատգամավոր Հայկ Բաբուխանյանը, դիմելով նախարարի պաշտոնակատարին, համաձայնեց, որ առաջարկվող փոփոխությունների մեծ մասը դրական է, սակայն նկատեց՝ ժամկետների առումով խնդիր է տեսնում: Բաբուխանյանի համոզմամբ՝ նոր ընտրական օրենսգրքի փոփոխություններից հետո ընդդիմադիր ուժերը հնարավորություն չեն ունենալու ցուցակներ կազմելու և նոր օրենսգրքով ընտրություններին պատրաստվելու համար:

Արտակ Զեյնալյանն արձագանքեց՝ առաջարկվող փոփոխությունները գործող իրավակարգավորումների պարզեցում են ենթադրում:

«Անցում ենք կատարում ամբողջովին համամասնական ընտրակարգի, եղած փոփոխություններն ընդամենը պարզեցվում են. այնպիսի մեխանիզմներ են ներառված, որոնք եղածները կատարելագործում են»,- վստահեցրեց նախարարի պաշտոնակատարը:

Տեղեկացնենք, որ նախագիծն արտահերթ նիստի օրակարգ է ներառվել հատուկ ընթացակարգով, ինչը ենթադրում է, որ նախագիծը առաջինից երկրորդ ընթերցում քննարկվելու է 24-ժամյա ռեժիմով:

Սա էլ առաջացրեց ՀՀԿ խմբակցության պատգամավոր Խոսրով Հարությունյանի դժգոհությունը, պատգամավորի խոսքով՝ նման կարճ ժամանակահատվածում հնարավոր չէ առաջարկներ ներկայացնել ու մանրամասն քննարկել:

Զեյնալյանն արձագանքեց՝ 24-ժամյա ռեժիմը տեխնիկական հաշվարկի արդյունք է, հնարավորության դեպքում առաջինից երկրորդ ընթերցման ժամանակ քննարկման ռեժիմը կերկարաձգեն:

«Ծառուկյան» խմբակցության պատգամավոր Նաիրա Զոհրաբյանն էլ նկատեց՝ կա՛մ խորհրդարանը նոր ընտրական օրենսգրքով դեկտեմբերին ընտրությունների է գնում, կա՛մ «գնում սաբոտաժի ճանապարհով»:

Նաիրա Զոհրաբյան

«Բոլորին հորդորում եմ խոհեմության ճանապարհով գնալ և ունենալ քաղաքական կոնսենսուս ապահովելու ցանկություն»,- ասաց նա:

Արտակ Զեյնալյանն իր եզրափակիչ ելույթում առաջարկեց նախագիծը առաջինից երկրորդ ընթերցում քննարկել 24-ժամյա ռեժիմի փոխարեն 72-ժամյա ռեժիմով, սակայն առաջարկը քվեարկության չընդունվեց: Նախագիծը կքննարկվի 24-ժամյա ռեժիմով: