Վճռաբեկ դատարանը քիչ առաջ հրապարակեց երկրորդ նախագահ Ռոբերտ Քոչարյանի խափանման միջոցի վերաբերյալ բողոքներով որոշում, ըստ որի՝ Քոչարյանի խափանման միջոցի հարցն ուղարկվում է վերաքննիչ դատարան՝ նոր քննության:

Նշենք, որ Վճռաբեկ դատարանում այսօր քննվում էին երկրորդ նախագահ Ռոբերտ Քոչարյանի խափանման միջոցի վերաբերյալ դատախազության և Քոչարյանի պաշտպանների կողմից ներկայացված բողոքները: Դատական նիստը դռնփակ էր, սակայն որոշումը հրապարակվեց դռնբաց: Հրապարակման պահին Քոչարյանը դատական նիստերի դահլիճում չէր:

Հիշեցնենք՝ գլխավոր դատախազությունը օգոստոսի 20-ին բողոք էր ներկայացնել Վճռաբեկ դատարան` երկրորդ նախագահ Ռոբերտ Քոչարյանին կալանքից ազատ արձակելու Վերաքննիչ դատարանի որոշման դեմ:

Ավելի վաղ, 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա՝ 2018 թվականի հուլիսի 26-ին Հայաստանի Հանրապետության պաշտոնաթող նախագահ Ռոբերտ Քոչարյանին մեղադրանք էր առաջադրվել քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: